CHA tan MRI leh khawl dang hlan

CHA tan MRI leh khawl dang hlan
Aizawl Smart City Limited UD&PA department bultumin Civil Hospital Aizawlah MRI khawl bun thar a ni a, Thawhlehni khan UD&PA minister chuan mipui tan tlangzarhin bungraw dangte a hlan nghal.
UD&PA minister chuan mi harsa zawkte tana tihdamna hmunpui ang hiala kan ngaih, Civil Hospital Aizawl hmasawnna atana thawktute zinga a tel ve chu lawmawm a tih thu a sawi a. MRI khawl chu mipui tan a ni tih a sawi.
Health minister Lalrinpuii pawhin sawrkar department hrang hrang inkara thawhhona tha a awm chu lawmawm a tih thu a sawi a. Public hospital-te chu mi harsa zawkte tan a pawimawh avangin thawmtha turin Mizoram sawrkar chuan hma a lak mek zel tih a sawi. ZMC-ah ICU 13 siam belh a nih dawn thu, Siaha, Lunglei leh Champhaiah pawh ICU 5 theuh siam a nih tur thu leh, hun reiloteah kal thlak (kidney transplant) an tih ve theih tawh dawn thu a sawi bawk.
Aizawl Smart City Ltd chief executive officer CC Lalchhuangkima sawi danin, MRI khawl hi German company – Siemens Healthineers kutchhuak niin, cheng nuai 872 man a ni. A chhiat pawha enkawl zuina tur thawhdunna thuthlung kum 10 chhung atan an ziak a ni. Smart City hmalakna tho hian Civil Hospital Aizawl tan khawl dang chi 24 lei a ni bawk.
Aizawl Smart City hian tunhnaiah sawrkar leh private hospital hrang hrang tan ambulance 8 lei a ni a. Tuirialah Common Bio-medical Waste Treatment plant cheng nuai 801.15 senga an din chu kumin April khan hman tan a ni.