Chak ve ta hram mah se United tan keeper thar hlamchhiah rem chuang lo

Chak ve ta hram mah se United tan
keeper thar hlamchhiah rem chuang lo
Inrinni zanah Premier League season kal laia a vawi khatna atan Manchester United chuan hnehna an sualchhuak ve ta hram a, mahse, 3-2-a an mikhual Burnley an hneh hramna khan nipui bazar hun tawp hma ngeia goalkeeper rintlak ngei tur lakpuh hman an tumna kawngah inthlahdahna a thlen a la rem chuang lo!
League match an khelh hmasak pahniha tlawm leh draw nena bultanna hahthlak zet philipui Ruben Amorim chuan a vawi thumnaah lawm tur a nei ve ta hram a; hun pekbelh minute sarihnaa captain Bruno Fernandes-a penalty chhuihluh hmangin Old Trafford luahtute khan an fans hlimna an siamsak a, mahse, an kawtkaia goal hnih ngawt an chhuah leh khan an tlarhnung pawp a la phui lohzia a entir chiang hle a, keeper rintlak zawk dap kawngah tha thlah thei an la ni lo tih a lantir!
He inkhela goal hmahruai hi first half minute 27-a Josh Cullen-a own goal niin, he goal khat hmang hian half time thlengin United-in sikhat faiin hma an hruai.
Second half tir lam minute 55-ah Lyle Foster chuan Burnley siphurh sutna goal khung bawk mah se minute hnih a ral leh hmain Bryan Mbeumo chuan mualneitu team hmahruai nawnna goal a tilut ve leh.
Minute 67-ah Manchester United goalkeeper talbuai fo Altay Bayindir bawk dem theih zawngin a khawsa leh a, Jaidon Anthony-a’n mikhual team siphurh a sutna kawngah tihsual lian a nei leh a, team pahnih khan 2-2-a inhnehtawk mai tur hmel an pu leh hman!
Hun pekbelh tawp hnaih tawhah VAR chuan Amad Diallo laka lehlam pawl ‘foul’ a man chhuak hlauh a, penalty atangin Fernandes chuan season thar league-a United chak vawi khatna thlentu goal a khung.
Burnley goal hnihnaa mawhphurtu lian Turkish goalkeeper Bayindir khan Manchester United Premier League game hnuhnung paliah starting line up chang fai vek mah se sawisel a tawk chho ve reng a; an bultannaa Arsenal an hneh lohna game-ah pawh khan Declan Rice-a corner pet hmunhima a chum sawn zawh loh avangin si an phurh phah a tih theih!
Karliamta kar laihawl cup football-ah United hi fourth-tier team Grimsby chuan Old Trafford ngei maiah an petchhuak leh a; kha mi tum pawh khan an keeper Andre Onana chu Grimsby corner petah a chesual ve leh a, Manchester United-in an goal hnihna an chhuah phah a, mualpho takin an tlawm zui ta a nih kha.
Inrinni Burnley game-ah Bayindir a kirleh a, holam angreng takin Loum Tchaouna second-half shot chu a thianfai zo lo a, ball vir vel chu Jaidon Anthony-a buaipui theih turin a insiamrem a, mikhual team siphurh sut vawi hnihna a thlen phah.
Inkhelh banah United boss Amorim chuan, “Tun dinhmunah tak hi chuan Manchester United goalkeeper nih hi a khirh khawpin ka ring.
“Mihring ve tho an ni a; Manchester United-ah chuan engkim hi news a ni vek si a.
“Mi zawng zawngin goalkeeper chungcxhang an sawi vek a, goalkeeper leh thil thleng mek chu ka thlak thei a, chu chu kan tun hun tawn mek a ni.
“He club chhunga player-te hi an chi-ai deuh hlek rih niin a lang a, chu erawh thil pangngai tho niin, goalkeeper-te chauh hi hmasawn ngai an ni bik lo a, an zavai hian insiamthat ngai vek an ni,” tiin keeper-in kawh an hlawh thu leh squad pumpui hmasawn ngaih thu a sawichhuak.
He thu buatsaih lai thlengin United hian goalkeeper thar zawn hna ngawrh takin an la kalpui mek a; tun dinhmunah keeper Senne Lammens lei turin Royal Antwerp an dawr mek tih hriat a ni a; kartawp Belgian Pro-League game-ah pawh Lammens hi squad-ah telh a ni lo.
Galatasaray pawhin Lammens bakah United keeper-te an beisei tih hriat a ni a, hetih lai hian Turkish deadline hi September ni 12-a khar chauh tur a nih avangin Old Trafford club ai chuan an dinhmun a hmanhmawhthlak nep deuh zawk.
Lammens hian United a duh tih hriat a ni tawh a, mahse, zanina transfer hun an khar hma hian eng thil nge thleng dawn sawilawk mai theih a ni rih lo.