CHAKAI NUFA

By Dr. C. Lalrampana
A KAMKEUNA

Inzirtirna kawnga thawnthu lar tak, vawiin thlenga khawvel huapa sawi hlawh, Mizote pawhin kan sawi uar em em thin chu chakai nufa kal inzirtir dan chanchin hi a ni awm e. Chakai chuan a fapa hnenah,“Engatinge khawmualah saisir zawnga i kal thal haw haw zel le, kal dan dik a ni lo, ngil takin kal ta che?” a ti a. A fapa chuan, “Ka nu, engtia kal tur nge ka hre hlei nem, kal dan dik chu min zirtir phawt la, i kal dan angin ka kal ve mai dawn alawm!” a ti a. A nu chuan a’n zirtr ngial a, mahse, a fapa kal ang bawk chuan a kal saisir leh haw haw tho si.
A fapa chuan a nu kal dan chu uluk takin a lo thlir reng a. A tawpah, “Ka nu, ka kal dan ang bawkin i kal tho va, engmah danglamna a awm chuang hlei nem; nangmah atangin zir chhuah tur reng ka nei lo ve” a ti a. Hmasawnna reng an nei chuang lo. Chuvangin. Mahni insiamthaa chu chu a taka nunpui phawt loh chuan midang dik lohna ngaimawha zilhhau thin hi thil sawt lo ber a nih hmel hle. Chuvangin, mimal, chhungkua, khawtlang, pawl, kohhran, sorkar thlengin he thawnthu tawi, zirtir tha tak nei hi kan ngaihtuah zui a ngai hle ang.
CHAKAI NUFA KAN ANG
Mizote hi kan thluak a tha a, engkim hi a hranpaa zir em em ngai lovin kan thiam zung zung thei a; thil tha leh tha lo pawh mi tihdan la chhawng thiam tak leh la chhawng chak em em thin kan ni. A bikin khawvel sualna chihrang hrang leh chin tha lo phei hi chu kan la chhawng rang hle thin. Khawvel hmun danga chin tha lo (bad practices) Social Media hrang hranga kan hmuh thil thar tam tak, zorama la awm ve mai lo tura kan ngaihte thleng hian kan thalaite hian tawn hriat an lo nei hman zel a, a awm lo emaw kan tih thin hi a lo awmin an lo nei ve hman zel tawh thin. Nu leh pa mawl zual deuh phei chu min tlan khalh hneh tawh lutuka bum fin zawh loh hial kan ni tawhin a lang. A tha zawng pawhin bungraw ttha leh changkang (materialism)-ah phei chuan Khawvela thil tha leh changkang ber berte hi kan hmelhriatin a takin kan lo nei ve zung zung hman thin hi thil mak tawpthang chu a ni. “Pawisa a awm lo, pawisa a vang, sorkar rethei kan hrawn” tiin kan iak kan iak chung hian thil tha ber ber leh changkang ber berte chu kan lei pawp pawp thei tho si thin hi chu Isua zirtirte anga hak lai nen chauha khawsa thinte nen kha chuan tehkhin rual kan ni ta lo ve. (Mat. 10:9-10)
KAN INTIHHMUH |HA LO CHU?
Khawvel changkanna avanga in (building) tha, bungraw tha (Materialism) lama kan intlansiak chur chur lai hian, a nei pha ve lote pawhin neih phak ve phet tumin an theih dan kawng kawngin sum leh pai an zawng a; an phi ruai thin. Zah leh mawihawih pawh dawn tawh bik hek lo; a ham theih theih an ham khawm a; ruihhlo, man to, hlawk thei tur, rangkachak, lunghlu, ralthuam hlauhawm sumdawnna atana hlawk apiangah tlanin kan ram chu India rama State hlim ber, sualna chihrang hrang tamna nambar pakhatnaah min hlangkai ta mek chu a ni a, zah nachang lah kan hre der si lo. State hlim bera puan kan nihna chhan hi Pathian tih loh chu a awm vek emaw tih mai tura khawvel hlimhlawpna chihrang hrang a tam vang hi a ni mai lo’ng maw? Pu Ngurthangvela’n “Sodom leh Gomora kan iang zo ta” a tih kha a va’n lo dik tehlul em! Ruihhlo chi hrang hrang kan hmelhriatna chin hi kum 20 lek la ni mah se, kan thalaite’n an thih phah nasat tawh dante han thlir hian Covid-19 aiin Ruihhlovin min nuai na zawk a nih hi! END Report thar bera a lan danin kum 20 liam ta chhung khan Mizo thalai ruihhlo vanga thi mi 1,775 an awm a. Kum tin ruihhlo vanga thi mi 88.75 awm ang kan ni. Natna hlauhawm, hripui leng, awm lai leh chetsualna chihrang hrang vanga thi ni se’ng chuan lung a dam deuh tur; India ram puma Kristian tam berna dawttu chenna ram ni si, ruihhlo hlauhawm avanga heti taka nunna chan kan ngah thin hi a lungchhiatthlak takzet a ni. State hlim ber tia puan ni mah ila, kei zawng ka hlim thei lo ka zak ngawih ngawih thin. Ruihhlo vanga thi zingah hian mipa 1,561 awmin, hmeichhia 214 an la tel zui bawk vei nen, kohhran leh mithiam thenkhatin zu ringawt kan buaipui a, zu kan ruih vak vak lai khan ruihhlo hlauhawm tha lo dang kan ngaih thah a; chik taka chhutletin zu vanga nunna chan chu mi 500 chuang awrh niin a lang. Chuvangin, tun inthlanpui hnaih tawhah hian zu ringawt ruihpui tawh lovin ruihhlo hlauhawm dang zawng zawng leh smuggling huap hian policy mumal tak kalpui a hun tawh takzet zawk a ni. Tunah phei chuan ruihhlo hlauhawm zuar leh ngawlvei thar an pung nasa em em a; ralthuam hlauhawm leh smuggling-a sumdawng an tam sawt hle bawk. Sawi ringawt lovin kan politician, kohhran leh NGO, mimal, chhungkua, khawtlangte hian a taka thawha a tiha tih a hun ta hle.
A TLÃNGKAWMNA
Kan thawnthu tawi zirho khi ngun taka bihchian chuan chakai nufate khian engmah inzirtir chhuah an nei lo tih kan hre thei awm e. A chhan chu a zirtirtu berin kaldan dik a zirtir thiam loh vang leh a chin dan ngai bak thiam dang a neih loh vang a ni. Ruihhlo hlauhawm pawh hi kum 20 chhung zet kan do tlang ta. Do dan kawng hrang hrang seminar, kawngzawh, lem inziahsiak, essay inziah siak, musical concert, drama, radio, DD, film, media, leh programme hrang hrang hmangin kan bei nasa tawh hle. Mahse, tun thlengin kan la hlawhchham a; ruihhlo a hluar tual tual a; ruihhlo ngai an pung tual tual a, ruihhlo vanga nunna chan an tam tual tual bawk. Chhung tinin hmarcha kan ei nasa, naupangin an ei ve chuan kan ngaithei lo thin, hmarcha ei ve lo turin duh hle thin mah ila chhungkuaa kan ei chhung chuan ei hun an nei ve leh nge nge thin. Ruihhlo pawh hi engang pawhin dovin kan fate hi ruihhlo ti lo turin fuih chamchi thin mah ila nu leh pate’n ruih theih thil chihrang hrang meizial, zu, sahdah, khaini, gutkha, kuhva kan tih khum reng si chuan kan tu leh fa thalai rualte hian chakai nufa kal inzirtir ang maiin kan kal dan zel an rawn zir a ni ngei ang tun thlengin a saisirin kan la pen tlang dial dial ni berin a lang.
Newmai News Network June 20-in a tarlan danin Mizorama chhungkaw 56,584 zingah Below Poverty Line (BPL) chu 19.63 % an ni a, chuti a nih chuan BPL chhungkua 11,107 an awm tihna a ni. Hei hi BPL baseline survey 2016 anga chhut a ni. Heti khawpa mihring cheng tam lam phu loh khawpa BPL tamna si hi India rama ruihhlo hlauhawm tih ching leh tawlh ruk tamna kan ni thei bawk si hi ngaihtuah chian chuan BPL awm ve miah lohna Kottayam district, Kerala nen chuan kan inang lo hle. Kum tin ruihhlo do nan leh tawlh ruk nan sum tam tak tak kan seng a, mihausa aiin BPL chhungkaw member atangin ruihhlo bawiha tang leh thihpui an tam zawk nia ngaih a ni lehnghal vei nen; chuvangin, kan Zoram nun leh kalsiam hi her danglam a pawimawh tawh takzet a ni e.