Chalfilh biala ding tur la ruat lo

Sorkarna chang mektu MNF party-in inthlanpui
lo awm tura an candidate tur an tifel kim thuak tawh a, mahse Chalfilh biala ding tur an la tifel thei lo.
Bial 27-ah MLA an nei sa a, minister pahnih R Lalzirliana leh Robert Romawia Royte te’n bial an sawn ang. Mi dang chu a ngaiah an ding dawn a, bial awl an neihtea ding tur pawh an tifel tawh, Chalfilh bial tih loh chu.
Kar hmasa lamah khan Aizawl South II-a ding tur an tifel a, 2018 inthlana he biala ding tawh Denghmingthanga an ruat fel. Tihian Chalfilh bial tih loh chu an tifel ta a ni.
Chalfilh biala ding tur ruat tur hian ngaihtuahna an seng nasa a, hemi chungchangah hian harsatna an tawk nia hriat a ni.
Thu dawn danin, he biala din tum hian mi pangain theihtawp an chhuah a, mahse Nomination Committee-in anni panga zinga pakhat thlan chhuah ai chuan mi dang ruat an tum dawn a ang.
He bial hi Lalrinliana Sailo, speaker bial a ni a, thil a inlumlet thut a nih loh chuan ani hi ding tawh lo turah ngaih a ni. Hei hi he biala ding tur chungchanga MNF-in harsatna an tawh pawh a ni tih thu dawn a ni.
Tun hnaiah MNF vice president Vanlalzawma leh treasurer K Vanlalauva te chu Chalfilh biala ding tur hian an ti chhin a, mahse hei hi a puitling dawn lo nia hriat a ni.