Chalk hmanga milem ziak lian ber

Connecticut a cheng hmeichhe pakhat chuan an kawtlai chu chalk rawng chi hrang hrang hmangin a chei vak mai a, chalk hmanga milem ziak lian ber record a siam der mai.
A hming chu Preeti Gundapwar a ni a, Nothern Lights lem ziah nan hian ni thum chhung hun a hmang a, a milem ziah hi 2,389.59 square feet a lian a ni. Gundapwar chuan, “Nothern Lights hi siamtu kutchhuak art ropui tak niin ka ngai a, rawng chi hrang hrang a nei a, min tihlim thin a ni,” a ti.
Gundapwar hian a lem ziah hi Guinness World Record-ah a document te thawnin, an chhanna a la nghak mek a ni. A hmaah Guinness World Record-in chalk hmanga lem ziak lian bera an puan chu Giovanni Bassil-a’n 2021-a a ziah 2,152.78 square feet a lian a ni.
Gundapwar chuan hetiang milem lian a ziahna chhan sawiin, “Keimah leh keimah ka incho phur a, eng chin nge ka tih theih tih leh eng nge ka phak chin tih infiah ka duh a ni. Record hi ka siam a nih chuan rah duhawm tak ka seng a ni mai,” a ti bawk.