F. Lalremsiama
Chaltlang
Mb: 8415994340
-- Advertisement --
Kan Tourist Lodge chungchang, Outsource leh 5 Star Hotel, awt/duh hliah hliah tawh ang maia Tourism Minister thusawi khan min nuai nasa hle mai a. Ka rilru leh ka duh dante tarchhuah tlaka remkhawm harsa ti hle mah ila, kum 62 chhung lai, mahni inah hian ka nu hoin chhungkuain kan lo awm ve tawh a. Tourist Lodge din hma kum 20 zen zawn a lo awm hmasa chu, kan inti NEITU ve em em a ni. Chumi rilru chuan ka chhungril a buan a ni ber mai.
Outsource tawngkam leh a hmanna (practice) hi thil thar, hmasawnna leh changkanna hmanrua, tun hnai thil a ni. ZPM Sorkar hi huaisen taka Land Record siamna tur, Survey ti tura Private party ruai tura hma la mek niin ka lo hria. Congress leh MNF Sorkar te khan, an enkawl sen loh, zawh loh NGHAWNGKAWL an phurh zawh loh vanga Tourist Lodge leh Wayside Restaurant te outsource an ni. Thiamchan (justify) nan Thingdawl Wayside Restaurant te, Chhiahtlang Tourist Lodge te an outsource hial maw? Fianrial leh boruak thiang leh nuam tak, riahna tha, fel taka awm hle hle thin niin ka lo hria, ka hresual em ni aw? Mipuiin an hriain ka ring.
I sawi zel ang aw. Pu Hawla, Chief Minister hlui tawngkam takin, Education Deptt. tih loh rau rauah chuan, Tourism Deptt hi Mizoram chhunga “KIT HNAWK” nasa ber niin ka hria. En mah teh. Rope Way, Sky Walk: Chalfilh (Vanzau) Tourist Lodge leh a panna kawng, tlangpang ramngaw dur tichhe zotu – National Green Tribunal ten an ngaihdam theih miah loh khawpa Environment Hmelma? Tu rawt nge? Kawlrit rawt a ni lo! Khawruhlian, Phaileng, Khanpui leh Lailak khuaa mipui chuan helai Chalfilh tlaklam ramngaw dur pui thin kha an mitthla thiam em em ang. An outsource naa Regular Staff-te an remfel dan hre lo mah ila, mingo val tawngtha (maxim) “Do not bite more than you can chew” = I thial theih loh khawpa tlanglian keih (seh) thla suh tih hi kan inhrilh thar a ngai ta hle niin a lang. |ha tak maia thialsawm theih tawk te te keih (seh) thlak tur hi Health Deptt leh Social Welfare Deptt-ah te hian a tam hlei hlei hmel bawk si!
Inhmeh lo – ti ila, a chiang lehzual awm e. Harsatna hmunah leh arpa chan lai te pawh hian FIVE STAR HOTEL (Hotel Pui) ah hian a leng tam teh mai ania! “Phaibawk Kawnah Engkim, engkim a awm” tih thin laia sawi lan chian loh, awm ngeia hriat si chu Zu leh Hmeichhe thilphal deuh te zu nia! Zu tha ber ber chi tinreng awmna, in nghal duh tan in mai theihna BAR awmna a ni. Thiangzau hote zawrh zawk awm tak Pastor tha leh inngaitlawm thiam, “Mi thianghlim Lawr” lo thleng phut ta mai se, LAWR hmasak ber tur zinga mi nupui tan a zawrh chi loh e! A inhmeh thei hlawl lo a ni. Rorelnaah Pathian Ram lo thleng rawh se titu ZPM Sorkar tih atan a inhmeh lo. Milian, Mi hausa te leh hnam dang dang te intawllenna leh nawm chenna, ei leh in tur tha ber ber an tlan puarna hmun HOTEL PUI hi State puitling ve riang ruang nih vanga Zofate Priority a ni thei rih lo hrim hrim bawk. “Value Assessment” ti tur ruat fel tawh anga richhuak te hi dai nghal hmak se ka va ti tak em!
A hmunhma hian a zo lo hrim hrim. Rope Way Plan-ah Station atan endik a nih pawh khan, a zim, a zau tawk lo, khawthlang lam lah kham ko sang tak a ni si an ti niin ka hria. A panna kawngpui lah pakhat chauh, a dang awm thei miah lo, kan veng paltlang, zauh ngaihna awm hauh lo tluk a ni. Kawngpui sir tawn tawnah in tha fe fe a khat.
Chaltlang mipui hian kan Tourist Lodge hi tihchangtlun leh phuisui zawka awmtir zel hi kan duh a ni. Mipui mar min dehsak se, a chan ral tur kalphung thar ni lo in, |hatpui tur Mipui Sorkar kan beisei a ni. Tourism Director puitling, Pu B. Sanghluna hetilai hnai teah hian a inbengbel a, min la dampui. Director Pension hnuhnung ber, Pu Saitluanga pawh, hnai zual zawk deuhah a inbengbel. Kan kohhran Upa tha tak a ni zui zel. Mizoram Sorkara Chief Secretary hlui panga (5) zet te inbengbela awmna, hi ngaihnep lohin awm se thain ka ring mang e. Officer lian fe fe leh Padma Shree pahnih lai, hming tha tak tak te lenna khua a ni. ZPM Sorkar-a Minister lian pakhat tana thawh hlawk ber berte tawm khawmna Chalkhawpui asin maw le! In dawn chiang lo em ni aw? Sorkar in ni, in thu thu phei chu a ni. Mahse induh thei ve tak khua kan nia.