Champ lai Gauff zinkawng a tawp

American Coco Gauff-i US Open title humhim beiseina chu a tawp fel ta a, a chipui Emma Navarro chuan Pathianni fourth round inkhel pakhatah 6-3 4-6 6-3-in a hnawtchhuak.
Third seed Gauff hi thla hnih kalta mai khan 13th seed Navarro hian Wimbledon last 16 atangin a lo hlap tla tawh a, New York grand slam tournament-ah pawh Navarro ngam loin champion lai a tlawm zui leh ta a ni.
Navarro chuan, “Kum hnih liamta chhung khan he hmunah hian first round ka paltlang zo lo ve ve a, tuna quarter-final ka thleng ta hi sawi ngaihna pawh ka hre lo. He khawpui hi ka pianna a ni a, ka tan chuan he hmuna inkhelh hi a special bik hliah hliah a ni,” tiin Gauff-i unforced error 60 ngawt mai hlawkpuitu Navarro chuan Flushing Meadows-a a la thlen san ber tum chungchang a sawichhuak.
Navarro hian last eight lamah Pathianni inkhel danga 6-1 6-2-a Chinese Wang Yafan sawptu 26th seed Paula Badosa a hmachhawn leh ang.
Kum 23 mi Navarro hian 2014-a title la nawn Serena Williams hnu lama US Open title humhim thei hmeichhe player hmasaber nih tum Gauff-i beiseina a tihtawpsak rualin American hmeichhe zinga kum 2004 champion Williams hnu lama kum khat chhunga Wimbledon leh US Open quarter-final lut ve ve thei naupangber a ni bawk.
Ranking thara world top 10 huang luah chho ve tawh tur Navarro hi college player hriat hlawh ni thinin, nikum khan a career-a a WTA Tour semi-final hmasaber a thleng a, kumin January thla khan pen khata hma sawn lehin Hobart-ah a title hmasaber a hlawhchhuak.
French Open fourth round a thlen hmain Indian Wells lamah world number two Aryna Sabalenka pawh a lo hneh tawh a; kumin July thla Wimbledon quarter-final match-a Jasmine Paolini a hneh loh hnu Grand Slam tournament a khelh leh vawikhatnaah Grand Slam quarter-final bawk a thleng zui leh a, a major title hmasaber hmin kum a ni dawn em kan thlir zel ang.
Thawhtanni zingah 2024 Paris Olympic Games hmeichhe tennis singles gold medal awrhtu Chinese Zheng Qinwen pawhin Croatian Donna Vekic laka 7-6 (7-2) 4-6 6-2 hnehna changin, zaninah world number two Aryna Sabalenka nen semi-final luh an inchuh zui leh dawn a ni.
Kum 2009 leh 2013 daih tawha US Open quarter-final lo khel ve tawh Li Na hnu lamah seventh-seed Zheng hi Chinese hmeichhe zinga US Open last eight vawihnih lut leh thei hmasaber a ni.
Zheng leh Vekic inkhel kha US Open Pathianni zan inkhel chanchina khawvar lam (Thawhtanni khawvar) an la hnaih ber record niin, US sanaa Thawhtanni zing dar 2:15 an thleng a, a hmaa Pathianni zan inkhel an ban tlai ber record chu kum 2021 last 16 inkhel pakhata Maria Sakkari laka Bianca Andreescu tlawm tuma zing lam dar 2:13 an thleng kha a ni.
2012 US Open champion Andy Murray chuan Thawhtanni zing thuk taka an han kai hi na taka sawiselin, Grand Slam organiser-te demna a auchhuahpui.
Hnehna a chan zawhah Zheng thung chuanzan lam inkhelh chu nuam a tih thu leh New York-a a night session hmasaber a nih thu a sawi a, Thawhtanni zing lam thleng an hawlh chunga amah thlawp tlattu fans chungah lawmthu a sawi nghal.
Tunhnai khan French Open leh Australian Open lamah pawh zan tlai lutuka inkhel an zo chuan sawisel a lo hlawh ve tawh bawk. Kumin January thla khan ATP leh WTA Tours lam chuan thuchhuah intawm siamin dan thar an tichhuak a, zan lam inkhel chu zan dar 11 hnu lama tan loh ni se an ti a, mahse, he dan hi mahnia kalphung nghet nei ve tlat grand slam tournament paliah hi chuan hman a ni ve lo.
Zheng hian thla hmasa Paris Olympic gold medal match-ah pawh khan Vekic bawk hi a lo hneh tawh a, Croat hian New York-ah pawh phuba a la zo ta lo.
Chinese hmaa fiahna lian hmachhawn thei turin second seed Sabalenka chuan last 16 inkhel dangah 6-2 6-4-in double lama a lo kawp tawh thin Belgian nula Elise Mertens a hneh a, a zawna US Open quarter-final tum li a luhna niin, US Open bika singles match vawi 31 a khelh tawhah tum 25 a chak tling ta chiah a ni.
Belarusian Sabalenka hi nikum New York final-ah Coco Gauff hneh loin a tlawm a, kuminah title hlawhchhuak thei turin kawng dik a zawh leh mek a; kum 2016 daih tawha ropui Serena Williams hnu lama Flushing Meadows bika women’s singles quarter-final vawili lut zawn leh thei hmasaber a ni a, Grand Slam-a a inlan hnuhnung vawiriatah quarter-final leh a chunglam chin a la thleng pha vek a ni!
Major tournament last eight stage thleng zo loa a tlawm hnuhnunber chu 2022 Australian Open fourth round-a Kaia Kanepi a hneh loh kha niin, kha mi hnu khan Melbourne-ah chak loh a la nei leh ta rih lo a, kum 2023-ah title hlawhchhuakin, kumin January thla khan a title kawl lai a humhim leh a ni.
Olympic champion Zheng lakah fiahna lian a hmachhawn dawn kan tih laiin kumin Australian Open final-a a hneh hnu kha a ni a, inrintawkna nen Asian top player ni mek a hmachhawn leh thei tura ngaih a ni.