Champhai hospital RTCPR lab Trauma Centre & PICU hawng

Champhai hospital RTCPR lab
Trauma Centre & PICU hawng
District Hospital Champhaiah RT-PCR Laboratory, Paediatric Intensive Care Unit (PICU) leh Trauma Centre chu Nilaini khan Health & Family Welfare minister Dr R Lalthangliana’n a hawng.
Health minister chuan Trauma Centre chu Lungleiah an hawng tawh a, Champhaia an hawng leh chu a lawmawm tih sawiin, accident chi hrang hrang leh damlo tam takte tan a pawimawh bik tih a sawi. Mizoram district 11 awmah hmun danga awm ve lo, hmanraw changtlung taka thuam, damlo na zual enkawlna tur khum 50 awmna – Critical Care Block leh Integrated Public Health Laboratory chu Champhai district-ah din tum a ni tih a sawi a. Kumin inthlan hma ngeia a lung phum hman a nih tur thu a sawi.
RT-PCR Laboratory hi District Hospital Eye Ward building-a bun niin, DHME, H&FW department sum, nuai 21 senga din a ni. 2022 January 10-ah bul tanin, kumin April 6 khan zawhfel a ni. RT-PCR Laboratory hian kentel component 13 a nei a, RT-PCR khawl kaihhnawih hmanraw 17 lei a ni bawk.
District Hospital Champhaia Paediatric Intensive Care Unit (PICU) hi sawrkar laipui Emergency Covid Response Package II sum, nuai 14.40 senga sak niin, National Health Mission, H&FW department kaltlanga thawh a ni. 2022 April 30-a sak tan niin, hemi kum November 30-ah zawh a ni. ICU Room leh HDU Room bakah a kentel component dang 4 a tel a. NHM kaltlanga siam naupang ICU PICU hi Mizorama district hospital 6-ah siam a ni a, Champhai ami hi hawn theih pahnihna a ni. ICU hmanraw hrang hrang lei niin, naupang damlo na zual enkawlna turte an ni. ICU, HDU leh General Ward-te nena kalkawp vek thei tura ruahman a ni.
District Hospital Champhaia Trauma Centre hi sawrkar laipui Ministry of H&FW sum, nuai 80.83 senga din a ni a. LB Associates (Pvt) Ltd. thawh niin, 2018 June 22-a bul tan, kumin April 3-a zawh a ni. ICU khum 5 Trauma Ward khum 5, Nursing Station bakah component dangte a kengtel a ni.