Champhai South-ah mi 608 lawmlut

Zirtawpni khan Champhai South Block Congress Committee buatsaihin New Champhai Community Hall-ah Congress Party Workers’ Conference neih a ni a, mi 608 an lawmlut niin thuchhuah an siam.
He biala Congress candidate Dr Lallianchhunga’n thu a sawi a, “A hmingin Mizoram University-ah thawk mah ila, ka khingpuite sum leh pai neih zat ka ngaihtuahin ka te chem chemin ka inhria. An campaigner-te lirthei tha tha tak taka an tlan zur zur hmuh chuan a zamawm ve lek lek thin a ni. Mahse, Jehosaphat-a dotute kha tam hle mah se, Pathianin a hnehsak tih kan hria,” a ti a, “Keini Congress pawh hian Lalpa lam hawi mai loh chu tih theih kan nei lo,” a ti.
“Kumin inthlan chu Kohhran leh tlawmngai pawl lian ber, YMA te nen kan thu ken a inang tlat hi party dang te aia Congress party danglamna a ni. Kan ram, kan hnam leh kan sakhua humhim turin Tualto party te tihtheih chin a tlem hle. Central BJP thiltih dan hi Central atanga sût leh ngai vek a nih avangin Central-ah Congress party a sorkar theihnan Mizo Kristian ten thapui kan thawh angai a, Kristian taka Vote kan thlak a ngai a ni,” a ti.