Champhaia hmalakna tur lungphum hawng

Champhaia hmalakna tur lungphum hawng
Tourism leh Sports & Youth Services department hnuaia Champhai-a hmalakna tur pathum chu Thawhlehni khan a changtu minister Lalnghinglova Hmar chuan a lungphum a hawng a. Champhai Vengsang-a Heritage & Cultural Center sak tur, Keilungliah-a Eco Resort leh New Champhai field-a phullem phah turte a ni.
Minister chuan heng ho hi sawrkar hmalakna a nih rualin sawrkar chu a puitu tur a ni a, a thawktu ber leh hlawkna teltu ber chu mipui an ni, tiin, community based tourism an kalpui zel duh tih a sawi.
Heritage & Cultural Centre chuan meeting hmunhma tha tak a nei anga, conference hmanna atan mi tam takin an hmang dawn tih a sawi a. A enkawl leh venhim kawnga pui turin vantlang mipui a sawm tih a sawi. Eco-Resort pawh khualzin tam tak tan ei leh in leh riahna hmun tha tak a awm belh phah anga, Champhai-ah mi a hip belh ngei a beisei tih sawiin, “Champhai mipuiin khualzin dawnsawn dan in thiam chhoh a ngai dawn hle a, theih ang anga inzir turin mipui leh khawtlang hruaitute ka ngen a ni,” a ti.
Champhaiah hian District Tourism Office hawn a ni dawn tih minister hian a puang a, Champhai Tourist Lodge siamthat tur thu a puang bawk.
Artificial turf phah tumna New Champhaia football field tha tak an nei thei tur hi a lawmpui tih a sawi a. Champhai District Football Association leh khawtlang mipui chu tha taka enkawl turin a sawm tih a sawi a ni.
Heritage & Cultural Center leh Keilungliah-a Eco Resort Experience hi Tourism department hmalakna niin, Swadesh Darshan 2.0 hnuai ami a ni a; Eco Resort Experience-ah hian cottage, naupang infiamna hmun leh khualzin mamawh hrang hrang siam a ni ang. Heritage & Cultural Center-ah hian multipurpose hall, lounge, leh meeting room siam a ni ang. Artificial turf hi Ministry of Tribal Affairs hnuaia PMJVK scheme hmanga Sports & Youth Services hmalakna a ni a, inkhelhna mual tha tak siam a nih dawn bakah mipui thutna tur pavillion, a hungna leh inthlakna leh inthiarna hmun siam tum a ni.