Champhaia Nagar Van Project tlawh

Champhaia Nagar Van Project tlawh
Environment, Forest & Climate Change minister TJ Lalnuntluanga chuan Champhai leh a chhehvela Forest department hmalakna a enfiah.
Minister hian Champhai Zote rama Nagar Van Project kalpui mek, Tlangsam rama Satellite Wildlife Rescue Centre siamna tura ruahman hmunhma leh Conservator of Forests Eastern Circle Pisa, DFO Complex Champhaia sak mekte tlawhin hmalakna a enfiah bawk.
Nagar Van- Urban Forest Champhai Zote ami hi khawpui ramngaw, mipui tana boruak thianghlim pe chhuaktu tur, tuihna siamtu tur, lenkhawthawnna leh thil zirna atana ramngaw humhalhna hmun tur a ni a. Khawtlang hruaitu, NGO, mipui vantlang leh sawrkar tangruala thawhhona tha tak nen khawpui ramngaw tha din leh humhalh chu a tum a ni. Nagar Van Scheme hnuaiah hian khawpui ramngaw venhimna’na hung, a tulna laia thing phun belh, vantlang remchang siamte a tel a. Mizoramah tun dinhmunah Aizawl leh Champhaiah khawpui ramngaw siam hmalakna Nagar Van Project hi kalpui a ni.
Nagar Van Champhai Zote huamchhung ram hectare 50 vela zauah hian thing thawl deuhna laiah thing chi hrang hrang – Theihai, Theifeimung, Avocado, Pear, Theifarbang, Lamkhuang, Thingthupui, Khuangthli, Lenhmui, Tlaizawng, Chawmzil, Tei, Ngiau leh Char 2000 chuang phun a ni tawh a, phun belh zel a ni.
Ramri kaltlanga nungcha tawlhruk emaw ramchhunga dan loa nungcha kawl leh tawlh mante dahna leh enkawlna, Satellite Wildlife Rescue Centre dinna tur hian Tlangsam khaw bul Forest department ram chhung hectare 20 vela zau ruahman a ni a. Sawkar laipuiah project kimchang thehluh niin thutlukna ngaihchan mek a ni.