Champhaia ramsa dahna siam na’n central-in project pawm

Champhai Tlangsam Dumpui tlanga Satellite Wildlife Rescue Centre dinna tur hmunhma leh a panna tur kawng chu Thawhtanni khan Environment, Forest & Climate Change minister TJ Lalnuntluanga chuan tlawhin a enfiah.
Minister chuan ramri depa awm Champhai district kaltlangin dan loa nungcha tawlhruk thahnem tak man a nih tawh thu sawiin, Central Zoo Authority of India inkaihhruaina dan siamin sahuan pangngaia dahluh mai a remti loa, hei vang hian court rorelna leh enforcement agency dangten nungcha tawlhruk an man chu dah maina tur a awm loh avangin an awmna tur bik Wildlife Rescue Centre din tuma hma lak a ni tih a sawi.
Satellite Wildlife Rescue Centre dinna tur project siamte sawrkar laipuiin a pawm tawh tih sawiin, financial sanction pek thuai a nih theihna’n ministry lamin August thla tirah Technical Committee paltlang tura chhawpchhuah an tum tih a sawi a ni.
Ramri kaltlanga nungcha tawlhruk man a ni fo a. Ramri kaltlanga nungcha tawlhruk emaw ram chhunga dan loa nungcha kawl leh tawlh mante dahna tur leh enkawlna tur Satellite Wildlife Rescue Centre dinna atan hian Tlangsam khaw bul, Forest department hnuaia awm Dumpui tlang ram hectare 20 vela zau chu ruahman a ni a. A panna tur kawng ‘Tek den kawn’, Tlangsam atangin siam a ni ang.