Finfiah leh mai theihah pawh Duhoma’n dawt sawi hreh lo – MPCC

ZPM leader Lalduhoma chu finfiah zui leh mai theih thilah pawh dawt sawi hreh lo a ni tih Congress party chuan an sawi.
MPCC Media Department hruaitute sawi danin, Lalduhoma hian thirchhe siamna Lengtea ISPAT Industry chu cheng vaibelchhe za tam tak sawrkarin loan pe in, Congress sawrkar chu guarantor-ah a tang tih a sawi a ni tiin, “He thu hi 2018 October 29 khan Zaingen YMA Hall Khawzawlah Pu Lalduhawma hian a sawi a. Kum 4 liamtaa a sawi pawh nise, dawt a nihna a la bo loh avang leh, he a thusawina video hi Youtube hmanga vawrhdarh a la nih lehzel avangin thudik zawk mipui hriata puan tulin kan hria a ni,” MPCC Media department chairman Dr Lallianchhunga chuan a ti.
RTI-a zawhna, Commerce & Industries department-in a chhannaah ISPAT Industry hnenah department-in loan pek a neih loh thu leh guarantor-ah Congress sawrkar a tan loh thu a lang tih a sawi a ni.
ZPM leader, an party chief ministerial candidate-in finfiah leh nghal mai theih ang chi ah pawh chinchang hre lo zawk mipui hnena thu belhchian dawl lo a sawi hreh lo chu Mizoram tana pa nih tling a nih loh zia a lantirnaah an ngai tih MPCC thupuangtu ni bawk Dr Lallianchhunga hian sawiin, “Chief minister nih tum tan thu belhchian dawl loa mipui bawl vak hi thil tihawm leh mawi a ni loa, tunhnuah thu belhchian dawl chauh Mizoram mipui hnenah sawi tawh turin kan phut a ni,” a ti.