Champhaiah CD Ratio pung

Nikum December atanga kumin February thleng khan Champhai district-a bank hrang hranga sum dahluh leh mipui hnena loan hmanga pekchhuah leh zat Credit Deposit (CD) Ratio chawhrual chu 74.57% a ni a, hemi hma thla thum kalta aia a sanna chu 0.59% a ni.
Champhai district-a bank hrang hrang kaltlanga December 2022 quarter tawp thlenga hmalakna thlirletin District Consultative Committee (DCC) chu Nilaini khan an chairman, district bawrhsap James Lalrinchhana hoin an thukhawm a. Champhai District RD Block pahnih huamchhunga bank leh stakeholder-te hmalakna thlirho a ni.
Thutkhawma tarlan danin, December 2022 quarter chhunga Champhai district-a bank hrang hranga CD Ratio chawhrual chu zaa 74.57 a ni a, quarter hmasa September 2022 quarter tawpa CD Ratio 73.98% atangin 0.59% in a pung a; hei hian CD ratio tha ni tura hniam lam bituk zat 60% chu 14.57% in a khum a ni. Hemi hun chhung hian bank-ah cheng nuai 46726.99 dahluh a nih laiin bank-in sum a pekchhuah hi nuai 34842.65 a ni.
Sawrkar kum kal mek 2022- 2023, 2022 December tawp thlenga Annual Credit Plan hnuaia hnathawhte thlirho niin, priority sector atana target 6884 (cheng nuai 14511.51) atangin 4849 (nuai 8073.03), 55.63% tih hlawhtlin a ni a. Non priority sector hnuaia target 159 (nuai 3300) atangin 2130 (nuai 9723.41), 294.64% tih hlawhtlin a ni. Hemi quarter chhung hian PMMY kaltlangin Sishu hnuaiah 30, Kishore hnuaiah 171, Tarun hnuaiah 50, Stand up India hnuaiah 3, an vaiin mi 254 hnenah loan cheng nuai 1066.92 hu pek a ni.
Nikum December quarter tawp thlenga Social Security Scheme hnuaia inziaklut tawh zat chu – PMJDY hnuaiah mi 21510, PMJJBY hnuaiah 18410 awmin, hamthatna dawng thei tur 43426 atangin inziaklut nawn 6375 an awm a. PMSBY hnuaiah inziaklut tawh 23370 awmin, hamthatna dawng thei tur 59287 atangin inziaklut nawn 11320 an awm a; APY hnuaiah 803 an inziaklut tawh bawk. Hemi quarter chhung vek hian priority sector hnuaiah Non Performing Assets (NPA) cheng nuai 3793.40 (17.59%) leh non priority sector hnuaiah NPA nuai 132.47 (0.99%) awmin, bank chhawr tangkai dan inzirtirna Financial Literacy Campaign tum 148 neih a ni.
Line department leh bank-te chu an hnuaia hamthatna awmte a dawng thei tur mipuiin an dawn theihna’n kawng kawhhmuh nasa lehzual tur leh, puih an tulnaah thahnemngai taka pui tura chah an ni.