Champion lai Rybakina kal zel

Champion lai Rybakina kal zel
Ningani zanah defending Wimbledon champion Elena Rybakina chuan hliamin a tihbuai Alize Cornet laka 6-2 7-6 (7-2) hnehna changin Wimbledon hmeichhe singles third round a lut.
Kazakh Rybakina hian awlsam takin set khatna a la mai a, second set erawh a dan a dang ta a, a malpui dinglam tuam chunga inkhel France player tawhkhirh ve tak Cornet a tang thei hle a, court chhunga enkawl ngai khawpin tlu sual mah se tholehin match a khel zo a, huhang ngah leh dam ver vawr Rybakina kal zel tur a dang zo ta ngang lo a ni.
Rybakina khan Britain player Katie Boulter a tum leh ang.
World number 74 Cornet kha Wimbledon chanchina inbarakhaihna (upset) lianberte zinga mi thlentirtu pakhat niin, kum 2014 khan third round-ah Serena Williams a lo hneh nawlh tawh a; nikum All England Club-ah mai khan match 37 a chak zawn mek laiin world number one Iga Swiatek-i kal tluang lai titawptu a lo ni tawh bawk.
Kum 33 mi hian Ningani zanah pawh set hnihnaah world number three Rybakina a chhaihbuai leh hle a, inlehthalna lian thlentir leh mai thei tur awm angin a inlan hman a, mahse, malpui hliamin a tihbuai avangin upset lian dang thlentir leh a tumna a puitlin zo ta lo.
Inkhel dangah tleirawl kum 16 leka upa Mirra Andreeva chuan senior grass-court tournament a khelh vawikhatnaah third round lutin, 6-3 4-0 a nih laia hliam avanga Czech 10th seed Barbora Krejcikova inhnuhdawh a hlawkpui.
Tunhma lama grass chunga inelna la hmachhawn ngai lo Andreeva hian thla hmasa Roland Garros-ah pawh khan third round thlengin, All England Club-ah hian qualifying kaltlangin main draw a lut chho a, a chipui Russian ve bawk Anastasia Potapova nen an intum leh ang.
Dangerous Ukrainian wildcard tia media lamin an sawi Elina Svitolina pawhin Belgian 28th seed Elise Mertens laka 6-1 1-6 6-1 hnehna changin third round a lut a; set hnihnaah a mit tina mah se set thumnaah ropui takin a kirleh a, 2020 Australian Open winner Sofia Kenin nen fourth round luh an inchuh ang.
Kum 28 mi Svitolina hian kum 2019 khan Wimbledon semi-final a lo khel ve tawh a; a tum leh tur American qualifier Kenin hian Ningani zan second round match dangah 6-4 6-3-in Chinese Wang Xinyu a hlap chhuak.
American fourth seed Jessica Pegula pawhin 6-1 6-4-a Spain player Cristina Bucsa hnehin second round a paltlang a; fifth seed Caroline Garcia chuan set hmasa ber hloh zet chungin Canadian Leylah Fernandez lakah 3-6 6-4 7-6 (10-6) hnehna a chang ve bawk.
Ukrainian dang Anhelina Kalinina chuan ruah avangin a first-round match khelhna’n ni hnih hmangin, Spain player Jessica Bouzas Maneiro lakah 6-4 6-3 hnehna a sualchhuak.
All England Club-a inkhel dangah Czech 16th seed Karolina Muchova erawh a vanduai a, hliam avanga first round paltlang zo loin amah aia ranking-a 87-a hniam German Jule Niemeier chuan 6-4 5-7 6-1-in a hnawtchhuak.
Comeback kan hmuh zingah Croatian 20th seed Donna Vekic chuan set hmasaber a hloh tep hnuah American Sloane Stephens chu 6-4 7-5 6-4-in a hneh hram a; Swiss 14th seed Belinda Bencic pawhin American Danielle Collins lakah set khatna hloh zet chungin 3-6 6-4 7-6 (10-2) hnehna a changlet.
World number two hlui Anett Konta-veit chuan tennis a chawlhsan hmaa a singles match hnuhnungber ni taah second round a paltlang zo lo a, Czech player Marie Bouzkova chuan 6-1 6-2-a sawpin, kum 27 mi Kontaveit hian mixed doubles lamah hmabak a la nei a, Finland player Emil Ruusuvuori nen an inkawp ang.
Grand slam-a vawihnih champion ve tawh Victoria Azarenka chuan round three a luhna kawngah 6-3 6-0-in Argentina nula Nadia Podoroska a sawp a; US Open champion hlui Bianca Andreescu pawhin ruah avanga a first-round match sukuk khel zoin Anna Bondar lakah 6-3 3-6 6-2 hnehna a sualchhuak ve ta hram.
Ningani zan second round inkhel dangah French fifth seed Caroline Garcia chuan awlsam lo taka Leylah Fernandez hnehin Wimbledon third round a lut a, Estonian Anett Kontaveit hlapchhuaktu Czech Marie Bouzkova nen an intum leh ang.
Canadian Fernandez khan 2021 US Open final lutin Britain star Emma Raducanu a hneh lo kha a ni a, khami hnu khan tennis hmeichhe rising star pahnih Fernandez leh Raducanu hian boruak lian siam an harsat chho zel rih a ni.