Champion lailawk Gaethje

FC 324 neih a ni a, kawnghren hreng lailawktu tur zawnnaah Justin Gaethje chuan vawi kua ngawt chak zawn tawh Paddy Pimblett a hneh a, Lightweight interim champion a ni. Kawnghren inchuha dangah Natalia Silva chuan a kawnghren kawl mek a humhim ve bawk.
Lightweight a champion lailawk zawnnaah fighter hmasawn leh lar chak tak Paddy Pimblett leh fighter lar, fight hmuhnawm lantir thin Justin Gaethje te inhmachhawn tur hian ngaihven a hlawh hle. Kum naupang zawk leh vawi kua zet chak tluang tawh Paddy Pimblett chu mi tam takin chak zawk turah an ngai a. Fighter huaisen, tawnhriat ngah bawk si Gaethje a chak ringtu an thahnem viau bawk. Fight hmuhnawm takah Gaethje-an a la thatzia a lantir a, interim champion niin champion lai Ila Topuria a hmachhawn zui thei dawn.
Fight ngaihven hlawh takah hmuhnawm takin Justin Gaethje a inlan a, round khatnaah a khingpui a knock-out nghal teuh hle. |ha taka bul a tan hnuin round hnihnaah a khel tha zui viau a, kawng hrang hrangah chungnung zawk a ni vek. Round thumnaah Pimblett chetha hret mah se rpund linaah Gaethje-a’n ro a rel chhunzawm a, round tawp berah Pimblett a chungnung hret thung.
Fight hmuhnawm tak a tawp hnuin result puan chhunzawm a ni a, endiktu pathumten Gaethje chu an chaktir vek a, UFC-ah vawi kua zet chak zawn tawh Pimblett chuan hneh loh a tawng ve leh ta nge nge. Vawi kua chet a chak zawn bakah boruak a siam thiam vanga UFC thuneitute pawhin an duhsak nia an sawi thin Pimblett chuan interim champion ni a, champion lai Ila Topuria hmachhawn theihna hun remchang a neih a chhawr tangkai zo lova, fighter lar Justin Gaethje lakah a la that tawk lohzia lantirin a awm a ni ber mai.
Kum 37 mi Justin Gaethje hian UFC a chawlhsan har a rinawm loh a, title fight-ah Topuria a hneh lo a nih chuan Octagon-ah a kir tawh lo mai thei. A hun tawp lamah fighter tha Topuria a hneh thei a nih erawh chuan a ropuina ram a zau leh zual ang a, khawvelin Gaethje hi a theihnghilh leh tawh ngai lo ang. Interim belt hlawhchhuak zo ta lo Pimblett chuan an result chu a dik tawk viau tih a pawm a, tha zawka a kir tur thu a sawi bawk.
UFC 324-a kawnghren inchuhna dangah flyweight champion lai Natalia Silva chuan a kawnghren chuhpuitu Rose Namajunas chu unanimous decision hmangin a hneh hram a, a kawnghren a humhim. Silva hi flyweight a kawnghren inchuhnaah vawi riat a chak ta chiah a, he huanga kawnghren humhim rei ber Valentina Shevchenko record tluk turin vawi khat chak chiah a mamawh tawh a, a ropui zual deuh deuh zel.