Champion lawm Barca an tlanchhia!

Champion lawm Barca an tlanchhia!
Khelh li zet hmabak la nei chungin Pathianni zana 4-2-a mualneitu Espanyol hneh chungin Barcelona tan Spanish La Liga title a hmin chiang ta a, mahse, an thenawm fans chak lo thinrim hi hun tawp rualin khelmualah an tlanlut chiam a, Barca player-te hi an sahimna zawngin inthlakna pindan lamah baklengin an tlanchhia!
Catalan derby-ah hian first half chhungin mikhual lamin goal thum thawt an thun hman a; Barcelona goal hmahruai hi minute 11-na leka Robert Lewandowski thawh niin, minute 20-ah Pole goal tur chhawpsaktu rawlthar kum 19 mi lek Alejandro Balde chuan khung belhin, chawlhlawk hma minute nga la awmah Poland international Lewandowski bawkin a goal hnihna leh sithum faia mikhual team hmahruaina goal a thun ve leh a, ti hian, league season kal laiah goal 21 a thawh tling chiah.
Second half tir lam minute 53-ah Jules Kounde chuan sili faia away team hmahruaina a tauhlut ve leh a, Espanyol supporter-te thinrim a inchhekkhawl tam ta!
Mualneitu team tan Javier Puado leh Joselu-te’n an siphurh pahnih sut then ve bawk mah se table mawngphah chung chiah luahtu Espanyol dinhmun a that phah zo ta chuang lo a, hamrik hnuhnungber rik ruala khelmual chhunga an chim huk pawh kha duhthlan tur dang an neih loh vangah a puh theih awm e!
Barcelona hi season kal laia league game 34 an khelh tawhah vawi 27 chak tawhin, point 85 an hum tawh a, point 12 chiah beisei tur a awm tawh laiin anmahni hnaihbertu Real Madrid lakah point 14 zetin an sang ta a, kum 2018-19 hnu lama a vawikhatna atan khelh li la awmah La Liga title an hlawhchhuak fel ta a ni.
Tun hi August 2021-a inpuchhuak ta an club legend Lionel Messi awm loh hnua league title an sualchhuah leh hmasaber ni nghalin, November 2021-a manager atana Xavi Hernandez an sengluh hnua La Liga title an lak vawikhatna a ni nghal bawk.
Nikum October ni 16 khan Bernabeu-a 1-3-a an hneh loh Real Madrid lakah point thumin Barca an hniam a; group game vawiruka vawithum ngawt an tlawm tlin avangin Champions League last 16 an lut zo lo bawk.
Barca first team-a kum 17 teh meuh a khawsak chhunga La Liga title pariat lakpui tling Xavi tan manager ni chunga a season puitling hmasaberah team a chawikang chho ta tlat a; Pathianni zan kha kum 18 Barca thuam a inbel hnua season tawp ruala kalbo ve tawh tur captain Sergio Busquets tan zan danglam leh hnukulh teuhna zan niin, kum 34 mi hian Barca thuam inbel a league title pakuana a hmin a; championna hriltu hnaivai goal pahnih khungtu Balde leh Kounde tantun kha Barcelona colour inbel chunga La Liga goal an thun vawikhatna ve ve a ni.
Barcelona hian season tharah an stadium pui ber thuamthat tur avangin Nou Camp home an chhuahsan rih dawn a, mahse, an home game hnuhnung pahniha Real Sociedad an mikhual tur leh May ni 28-a Mallorca an mikhual hunah hian an fans lamin an khelmual hmingthangah ngei hian kum 2020-21 hnu lama an trophy lian hmasaber hawn an lawm thei dawn.
Tun hi Catalan team-in an club chanchina La Liga title 27 an lak tlinna chiah a ni.
League season kal laiah Barcelona hian goal 64 tilut tling tawhin, goal 13 chiah an la chhuah a, he division-a goal thun tam ber dawttu an nih laiin Europe league lian zual panga zinga defensive record nei tha ber an ni tel a; an khelmual bikah phei chuan goal hnih chiah an la chhuah a, pakhat chu penalty atanga lut niin, a dang chu own goal a ni.
Tlarhma lama Robert Lewandowski thawhhlawk laiin tlarhnung lamah mimalin goal-keeper Marc Andre ter-Stegen bakah defender pahnih Ronald Araujo leh Jules Kounde-te’n an thawhhlawk ve thung.
Barca tlarhnung venghimtu langsar pathumte hian an elpuite ‘attacking’ an tudai thin a, a bik takin, Araujo phei hi chu season kal laiah hnial rual lohin Europe top defender a tih ngam ang.
Spain champion an nih hnuhnunber tum kum 2018-19 khan Barcelona hian tlarhma lamah an club great pahnih Messi leh Suarez an kawl a, kuminah Lewandowski.
Financial Fair Play (FFP) rules-in a phuar avangin Barca hian sumlamah harsatna lian tak an tawk a, an superstar Messi pawh an hum zo ta lo kha a ni a, an club ropuina leh vanneihna pawhin a kiansan rei ta viau a, kuminah league title lawm tur an nei ve leh ta hlawl a ni.
Khelh 34-a point 20 hum chunga 19-na luah mek Espanyol dinhmun a derthawnn belh leh hret a, Pathianni inkhel kha an game khelh hnuhnung 11-a an vawikaw tlawmna ni tawhin, season li chhunga La Liga atanga an vawihnih tlakna tur an hnaih deuh deuh!
Khelh li an la neihah point liin hmun him an chuangkai zo lo mek a ni.