Champion ni chunga tlang REDS

November 30, Ninga zan khan Europa League 2023-24 khelh chhunzawm a ni a. Premier League club lian Liverpool chuan si li faiin an mikhual Lask an sawp a, Group champion niin last 16 an lut. Inkhel dangah West Ham United in si khat faiin Backa Topola an hneh a, Knockout round an lut ve bawk.
Liverpool an chak nuamsa
Group E hmahruaitu Liverpool chuan an group-ah a mawngphaha awm mek Lask chu Anfield-ah an mikhual a, an mualah si li faia hnehna changin, nuamsa takin an chak. An mualah awlsam taka an chak laiin an hnuai chiaha awm Toulouse an chak zo lo. Toulouse an chak zawh loh vangin khelh khat khelh hmabak nei chungin Liverpool hi group champion an ni chiang nghal.
Liverpool hian an mikhual Lask lakah an khel tha viau a, minute 15 chhung lekin goal hnih an thun hman der. Inkhel tan atanga minute 12-na lekah Luis Díaz chuan Joe Gomez siamsak atangin hmahruaina goal a thun. Goal hmahruai an thun atanga minute thum hnu lekah Cody Gakpo chuan Mohamed Salah siam tha tak chu awlsam takin a pet goal zui leh a, minute 15 an khelh tlin meuh chuan si hnih faiin hma an hruai hman reng tawh.
Hma takah goal hnih thun bawk mah se Reds in chawlhlawk hmain goal dang an thun belh thei lo. An hun tha an hloh fo a, Lask pawhin an hun tha neih an hlah ve bawk a, chawlhlawk hmain goal dang a luh belh thei lo.
Chawlhlawk hnu lamah Liverpool an khel tha chhunzawm a, goal an thun belh leh thuai. Minute 51-naah Reds hian penalty an hmu a, he penalty hi Mohamed Salah chuan harsatna tawk lovin a pet goal a, an goal thumna a thun. Minute 51 chhunga goal thum an thun hman vangin chak tur a chiang tawk viau tawh.
An mikhual lakah an chak dawn tih chiang tawk viau tawh mah se Reds an inthlahdah mai lova, goal thun belh ngei tumin tan an khawh. Hun tawp dawn hnaih minute 90+2-naah Alexander-Arnold ball pek fing tak chu Gody Gakpo chuan awlsam takin a pet goal a, an hmahruaina a tizau. Gakpo goal hnihna a luh hnu hian goal dang a luh belh tawh lova, Liverpool chuan si li faiin hnehna an chang zui ta a ni.
Awlsam taka Liverpool an chak laiin an hnuai chiaha awm Toulouse chu an mikhual Union St.-Gilloise nen goal awm lovin an lo inhnehtawk ve thung. Toulouse an chak zawh loh vangin Liverpool hi group champion an ni nghal a. Khelh nga atanga point 12 hmuin lehpelh theih an ni tawh lo. Group e-ah hian point 8 hmuin Toulouse hi pahnihna an ni chhunzawm a, an hnuai chiaha awm nen point thumin inthlau mek mah se an dinhmun a la chiang lova, lehpelh thut theih an la ni thung. Hetihlai hian Lask erawh an tlachiang viau tawh thung.
West Ham leh Brighton pawh an tlang
Europa Conference League-ah West Ham United an champion vangin Europa League-ah english team pathum an awm a. Chung team pathum; Liverpool, West Ham United leh Brighton & Hove Albion te chuan knockout round an lut vek a. West Ham leh Brighton te hi group champion an ni dawn em tih a la chiang lo thung.
Group A hmahruaitu West Ham chuan Mimualah TSC Backa Topola an hmachhawn a. Gradski stadion Backa Topola-a lenglut Hammers hian hun tawp dawn hnaih minute 89-naa Tomás Soucek goal thun hmangin hnehna pawimawh tak an chang a, point thum hlu tak an hmu. TSC Backa Topola laka an chak vangin Hammers hian an hmahruaina an hum him a, knockout round an lut chiang nghal bawk.
Group A-a West Ham elpui lian SC Freiburg chuan an mikhual Olympiacos chu si nga fai ngawtin an hneh a, Conference League champion an kal hlat tir duh bik lo. Group A-ah hian West Ham leh SC Freiburg te hian point 12 an hmu dun mek a. An ni pahnih hi group match hnuhnung berah an inhmachhawn zui dawn nghe nghe. An inkhelh hunah an inhnehtawk a nih chuan group champion ni chungin West Ham an tlang ang a. Freiburg tan group champion ni turin chak ngei ngei a ngai thung.
Group B-ah pahnihna ni mek Brighton chuan an kawng dal thei dinhmuna ding AEK Athens chu an mualah an luhkhung a, minute 55-naa João Pedro penalty pet goal hmangin hnehna pawimawh tak an chang a, group B-ah pahnihna an ni chiang nghal nghal. Brighton hian hun rei tak hnuah European competition an khel phak ve leh nawlh a. An mualah ngei 3-2 a an hneh loh AEK Athens chu Mimualah an hneh ve ta thung a. He an chakna hmang hian knockout round an lut chiang nghal a, las 16 an inhlangkai phak dawn em tih erawh a la chiang lo.
Brighton hian group champion nih theihna hun tha an la nei a, an chunga awm mek Merseille nen an inkarah point khat chauh a tla zep mek. Group match khelh hmabak an la neihah group champion nih ngei tumin tan an khawh zui ang. Ningani zana inkhel dangah Xabi Alonso enkawl Bayer Leverkusen an khel tha chhunzawm a, Bundesliga hmahruaitu hian an khingpui BK Hacken chu si hnih faiin an hneh a, group H-ah point 8 ngawta hma hruai falin last 16 an lut chiang hle tawh.