Champions League zan hmasaber thlirna

Champions League zan hmasaber thlirna
Thawhlehni zan khan UEFA Champions League Group Stage match hmasa pariat khelh zawh niin, nizanah game riat dang khelh leh a ni a, a zan khatna thlirkual thuak thuak teh ang.
Manchester City 3-1 Red Star Belgrade
Julian Alvarez chuan Group G match-a Manchester City goal hmasaber thunin Etihad Stadium-a an mikhual Crvena Zvezda lakah siphur hmasa chungin 3-1 hnehna an changlet a, The Etihad tana thawhhlawk Alvarez hian mualneitu team tan goal hnih a thawh.
Champion lai Pep Guardiola team hian inkhel tir lam thunun nghet viau mah se half-time hma lawkin an chesual a, Osman Bukari chuan Serbian champion hmahruaina goal a tilut.
City hi Champions League home game an khelh hnuhnung 26-a tlawm nei lo chunga bul tan niin, Thawhlehni zanah erawh dinhmun chhe zawkah an ding zet a, second half tan hnu lawkah Argentine Alvarez chuan Erling Haaland nena thawkdunin an siphurh a sut a; a hnu lawkah hmahruaina goal a thun zui leh.
Minute 73-ah Red Star keeper Omri Glazer chuan Alvarez cross-ah thutlukna siam sualin Rodri chuan 3-1-a mualneitu team chakna goal a thun a, inelna hrang hrangah a zawnin City-in an khelmualah match 19 chhung hnehna an chang tling ta chiah a ni.
City hian Istanbul khaw final-ah khan Inter Milan hnehin a tumkhatna atan Europe-a club trophy lianber an sualchhuak a, tunah an title kawl lai humhim tura an bultanaah mittlung takin hna hmasaber an hlenchhuak leh ta phawt a ni.
City tana lawmna khingbai deuh awmchhun chu Norwegian goal-machine Haaland chefuh zo leh ta lo kha niin, Champions League game li chhung goal khung zo loin, first half-ah a hun tha neih a bawhpelh.
Red Star Belgrade kha kum 1991 daih tawha European Cup title lo hawn ve tawh an ni.
Royal Antwerp veltu Barcelona
Barcelona khuaa Estadi Olimpic Lluis Companys-ah Catalan team hian mikhual an thleng a, Group H match-ah mikhual chunga zahngaihna lantir lo Xavi Hernandez-a team hian 5-0 hnehna nen Champions League bul an tan.
He inkhelah hian Atletico Madrid atanga loan-a an hawh Portuguese forward Joao Felix chuan goal hnih thawhin, Robert Lewandowski goal khat leh right-back Jelle Bataille ‘own goal’ bakah second half tir lama Gavi goal khat thawn nen Spanish giants-in Belgian debutants an sawp rethei.
Champions League season hnuhnung pahnihah khan La Liga champion hi group stage paltlang zo lo zawngin an khawsa ve ve a, kumin erawh an boruak hap a dang dawn ta nge season liamtaa Belgian title latu Antwerp lakah hnehna nuamsa nen bul an tan ta phawt.
Barcelona hian kum 2015 hnu lama Champions League tropy an hawn leh ngai ta lo a, Europe-a an ropui thin laia Barca midfield thununtu Xavi hnuaiah hian engnge an an leh dawn kan thlir zui zel ang.
Group H inkhel dangah Porto chuan Hamburg khawpuiah 3-1-in Ukrainian champion Shakhtar Donetsk an hneh ve bawk.
Paris St-Germain 2-0 Borussia Dortmund
Second half tir lama Kylian Mbappe penalty chhuihluh leh a hnu lawka Moroccan defender Achraf Hakimi goal hmangin Ligue 1 champion chuan Bundesliga team lakah hnehna nuamsa pangngai a sualchhuak a, Group F hna hmasa mittlung takin an hlenchhuak a, Thawhlehni zan inkhel danga San Siro-a goal awm loa inhnehtawk Newcastle United leh AC Milan sut tur an la nei bawk.
Parc des Princes inkhelah PSG hian ball chang tam zawkin, chance pawh an ngah zawk a, mahse, first half-ah goal an thun zo tlat lo.
Tun kha manager thar Luis Enrique tan French champion a enkawl hnua Champions League game a khelhpui vawikhatna a ni.
Milan leh Newcastle insual tawk
San Siro, Milan-a Thawhlehni zan Group F match dangah AC Milan chuan an mikhual Newcastle United an hneh zo lo a, team pahnih hi goal awm loin an inthathen ta phawt.
Kum 20 chuang an vahbo hnua Champions League kawtkaia kirleh Newcastle hi mualneitu team goal bawh na tak lak atangin an dam-khawchhuak hram a tih theih a; an game hnuhnung pahniha goal khung ve ve Milan Portugal winger Rafael Leao chu English team lakah pawh a tal na leh viau a, veilam sir atangin Newcastle defence chhaihbuai teh mah se Thawhlehni zanah erawh a hlawhtling zo ta lo a ni.
Season liamta Champions League semi-finalist Milan hian a tir phat atanga inkhel thununin, Magpies goalkeeper Nick Pope chu hla derh dawrh atangin Tommaso Pobega leh Leao-te’n an han fiah zuai zuai a, Samuel Chukwueze tauhluh tur pawh dansak a ni.
First half-a chance tha ber chu minute 34-a Leao chanpual niin, kum 24 mi hian penalty area chhungah Newcastle defender pahnih bum mah se a tum ber goal a sualchhuak zo lo.
Hnehna chang zo lo mah se Eddie Howe team tan hun rei tak hnua Champions League kawtkai an chuanchhuah leh hnua an result hmasaber kha a chhe hran lo ang!
Season liamta khan Premier League-a palina ni chungin Europe club competition lian berah Newcastle an kirleh a, Group F match hmasaberah Europe-a hnuhma hraw nei tawh luhkhungin point khat an hlawhchhuak zo a, French champion Paris St-Germain leh German giants Borussia Dortmund sut tur an la nei.
Milan hian an match khelh leh turah Dortmund chu Germany-ah an luhkhung dawn a, Newcastle-in St James’ Park-ah PSG an mikhual thung ang.
Lazio chhanhimtu goalkeeper
Mikhual Atletico Madrid laka tlawm ngei tawh tura an lan hnu hun pekbelh minute ngana a zawh hma chiahin goalkeeper tlanchhuak Ivan Provedel chuan Lazio siphurh sutna goal tauhlutin Thawhlehni zan Champions League Group E matchpakhatah team pahnih hi Rome khawpuiah 1-1-in an inhnehtawk.
Minute 95-a Provedel hian beiseina hnuhnung hlenchhuak turin a tanhmun a tlanchhuahsan a, Luis Alberto cross chu goal-ah chantirin, hei hi ball tawh hnuhnungber a ni nghal.
Stadio Olimpico inkhelah hian darkar chanve an khelh tlin dawnah Pablo Barrios chuan khaklutin mikhul hmahruaina goal a thun a, Lazio lamin an siphurh sut tumin theihtawp chhuah mah se chefuh thei loin Alvaro Morata chuan goal ban a tihper a; Provedel pawhin vawi duai lo an lama goal dang lut tur dangin, a tawpah he keeper hi ‘hero’ a ni ta a ni.
Provedel hi Champions League goal thun thei goalkeeper palina niin, kum 2000 leh 2009 inkara penalty atanga goal thum thuntu Jorg Butt, Sinan Bolat (December 2009) leh Vincent Enyeama (September 2010)-te hnung a zui ve ta a ni.
Lazio keeper kha Standard Liege tana AZ Alkmaar lama minute 95-na ve thoa goal thuntu Bolat tih loha penalty ni lo open play atanga Champions League goal thun thei goal-veng awmchhun a ni nghal bawk.
Thawhlehni zan Group E inkhel danga sihnih faia Celtic hnehtu Feyenoord chuan an group hma an hruai.