UCL-a player ropui zual pasarihte bihchianna
UCL-a player ropui zual pasarihte bihchianna
UEFA Champions League hi football club-te inelna ngaihhlut hlawh ber anga sawi a ni thin a; player tha, kei inti ve chinte chuan Champions League vawikhat tal khelh an chak thin. Tuntum hian inelna ngaihhlut hlawh UCL-a player ropui zual pasarih kan han chhawpchhuak e.
7. Paolo Maldini
Defender tha sawi apiangin Paolo Maldini hi sawi hmaih thiang lo tluk a ni. Defender tha, hmeltha leh mit meng mawi bawk si hian AC Milan tan kum 25 zet a khel a; Milan-in hlawhtlinna hrang hrang an chan theihna’n a thawhhlawk hle.
Milan hi UCL ah vawithum a champion-pui a, Champions League tia thlak a nih hma, European Cup a nih lai khan vawihnih a champion pui hman a, UCL-ah hian vawithum dang pahnihna a nihpui bawk.
6. Xavi Hernandez
Barcelona midfielder ropui, tuna an manager ni mek Xavi Hernandez hi Champions League-a player ropui zual zingah chhiar hmaih phal a ni lo. Barca tan Xavi, Iniesta leh Lionel Messi-te inkawp meuh kha chu hmuhnawm tak an ni.
Xavi hian Barcelona hi Champions League-ah vawili a champion-pui a; mual laiah a hmuhnawm theih em vangin ngainat a hlawh lehzual.
5. Karim Benzema
Christiano Ronaldo ropuina n hliahkhuh chang nei bawk thin mah se Karim Benzema ropuina hi sawibo theih a ni chuang lo. Tute nen pawh khel tlang se goal thun thei pawl tak a ni thei zel a, a nghet riau.
Saudi Pro League lama khel ta Bemzema hian Real Madrid hi UCL-ah vawinga a champion-pui hman.
4. Andres Iniesta
Iniesta hi sawifiah tur ni ta se – pate, ball thiam, fing leh fim tiin sawi ila, a fiah deuh ber ang. Messi ropuina belhchhahtu, Barcelona-in goal an thun theihna’na remchang siamsaktu ti telbawk ila a chiang lehzual awm e. Ball thiam bik a nih avangin UCL player ropui zingah chhiar hmaih chi a ni lo.
Iniesta hian Barcelona chu Champions League trophy vawili a lakpui hman.
3. Luka Modric
Kum zabi 21-naah Luka Modric hi midfielder ropui ber zinga chhiar tel a ni. Lionel Messi leh Cristiano Ronaldo-te inkara dawkchhuak a, Ballon d’Or dawng thei ngat a ni.
Modrid hian kum 2016 atanga 2018 thleng UCL-a Real Madrid an champion zawn theihna’n a thawhhlawk hle. Real Madrid hi UCL-ah vawinga a champion-pui tawh a, champion-pui leh theihna hun tha a la nei mek bawk.
2. Lionel Messi
Hnial rual lohin UCL player ropui zual zingah Lionel Messi hi a tel. Footballer ropui ber sawi tur ni se ani hi chu a chung bera awm ngei tur a ni a, UCL bikah erawh C. Ronaldo hnuaiah a awm a ngai thung.
Messi hian UCL trophy vawili a chawi a, record hrang hrang a hnut-chhiah bawk. UCL group stage-a goal thun hnem ber niin goal 80 a tilut tling. Round of 16-a goal thun hnem ber ni bawkin goal 29 a khawl tling a; UCL-ah team khat tana goal thun hnem ber niin, goal 120 a thun bawk.
1. Cristiano Ronaldo
Mi tam takin Cristiano Ronaldo hi Lionel Messi hnuaiah dah an phal ngai lo. A thiam a, a ropui a, UCL-ah phei chuan Messi chunga dah ngei ngei a ngai.
Ronaldo hian Champions League trophy vawinga a chawi tling a, UCL-ah goal 140 thunin, goal thun hnem ber a ni a, Messi meuh pawhin a khum hman loh vangin Ronaldo record hi khum har viau tura ngaih a ni.
Champions League ropuizia hriatchian a nih chang apiangin UCL-a C. Ronaldo ropuizia a chiang nawn leh thin ang.