Champwine hnu ah Hnahlan siam Isabella hralhna turah inrem

Champhai Winery atanga siam ‘Champwine’ hralhna tura inremna thuthlung siampuitu RR Sales Delhi chuan Thawhlehni khan Hnahlan Winery atanga siam ‘Isabella’ hralhna turah inremna thuthlung a siampui leh.
Champwine hnu ah Hnahlan siam Isabella hralhna turah inrem
Champhai Winery atanga siam ‘Champwine’ hralhna tura inremna thuthlung siampuitu RR Sales Delhi chuan Thawhlehni khan Hnahlan Winery atanga siam ‘Isabella’ hralhna turah inremna thuthlung a siampui leh.
Hnahlan Grape Farming & Processing Coop Society Ltd leh RR Sales Delhi te MoU ziahnaah hian Society aiawhin an chairman C Vanlalhriata’n hming a ziahhnan a, Francis Lalmalsawma Sailo chuan a telpui bawk. RR Sales aiawhin Business Development director V Lalrindika’n hming a ziahhnan thung. MoU hi Mizoram State Planning Board vice chairman H Rammawi leh Champhai North bialtu MLA Dr ZR Thiamsanga ten an telpui. MoU hi kum 5 chhung atana tih a ni a, hemi hnu hian ennawn leh zel a ni ang.
RR Sales hotute sawi danin, MoU ziah a nih tawh chuan a hralhna tur hi an zawnsak zui ang a, August thla tawp hian New Delhi-ah a khuhhawnna siamin Delhi leh a chhehvel atangin mi hrang hrang an sawm dawn a ni. Champhai leh Hnahlan Winery atanga siam grape wine chu India ram hmun dang atanga siam wine aiin a quality a hniamna bik a awm lo tih an sawi.
Hnahlan leh a chhehvelah grape seng mek a ni a, quintal sang chuang an seng tawh. Hnahlan Winery-ah hian kumhlui lama wine siamsa leh kumin ami nen litre nuai hnih chuang hralh tur an nei tura beisei a ni. Chhungkaw thahnem takin grape chin hi eizawnnan an hmang mek a. Grape huan siamthar an pung mek tih sawi a ni.
Mizoram sawrkar hmalakna in grape huan tuaithar (rejuvenation project) buaipui mek a ni a. Winery-te hi kum 10 chuanga upa an nih tawh avangin tuaithar a, tihlen a, wine quality tha zawk siam thei tura tuaithar tumin hma lak mek a ni tih sawi a ni bawk.
SPB vice chairman H Rammawi chuan tun dinhmunah grape chingtute hian tin khat hmun aia tama hma la an awm lo tih theih a ni a, hetianga a hralhna lam a that chuan tin 4-5 hmuna miin an chin chuan kuthnathawktute tan dinchhuah a awl lehzual dawn tih an sawi.
Tun dinhmunah Hnahlana grape chingtu zingah a thar tam pawlin kum khatah cheng nuai 12 man vel a hralh thei a ni.