Chanchin tawi nawi
Thlah dawn
PC party chuan an party office, Treasury Square ami chu January 20 hian an office building thlahna programme an hmang dawn a. PC hminga minister, MLA, councillor, elected OB ni tawh zawng zawng leh an party mi leh sa lo ni tawh zawng zawngte tel vek turin an sawm tih an sawi. January thla chhunga office bungrua senghawi a ni anga, February 2023 chhungin office building thiaha building thar sak tum a ni.
Khar dawn
Ramhlun Industry peng (Main road) leh Industry peng (College road) inkar kawng chu PWD-in January 19 (Ningani) atanga siamthat a nih dawn avangin helai kawng hi nitin zing dar 9.30 atanga tlai dar 5.00 inkar khar a ni dawn tih SP Traffic chuan mipui a hriattir. Hnathawh tibuai thei turin hnathawhna huamchhung kawngpuiah lirthei leh bungrua dah phal a ni lo tih a sawi a. Thupek hian kawng siamthat hna thawh zawh a nih hma a huam ang.
Heroin man
Excise & Narcotics Department (END) chuan January 17 khan hmun hnihah heroin gram 573 (hawng 46) an man. Chawhma dar 10.30 khan Ramthar North-ah heroin gram 73 (hawng 6) leh a neitu nia puh Melody Hmangaihzuali (35) Thuampui Veng Aizawl, tuna Ramthar North-a khawsa nia inchhal an man a. 2 Assam Rifles nen thawk dunin hemi zan dar 9.00 hian Bawngkawnah heroin gram 503 (hawng 40) leh a neitu nia puh – Lalnunmawii (50) leh Vanlalhruaii (28) Tuirial Airfield Venga khawsa ve ve nia inchhal leh, Lalsangliana (39) Zemabawk Industry Veng, tuna Bawngkawna khawsa inti an man bawk.