Reserve Bank of India (RBI) bultumin February thla chawlhkar hnihnaah hian sum enkawl leh peipun lama mipui hriat tur tul bakah sum leh bank account lama inbumna laka himna tur inhrilhhriatna – Financial Literacy Week hman a ni dawn.
-- Advertisement --
February 13-17 chhung khaw hrang hranga Financial Literacy Week (FLW) neih tum dan hi Nilainia larsap hmutu RBI Aizawl office, officer-in- charge P Shimrah, Mizoram Rural Bank chairman V Jayachandra leh RBI officer dangte chuan an hrilh.
Larsap Hari Babu Kambhampati chuan FLW neih chhunga mipuiin bank chungchang hre tura a duhte a sawi a. Loan tenau mamawhtu Aizawl khawpuiah pawh tam tak an awm tih sawiin, heng – hawker, chawhmeh zuar leh a dangte zingah Rs 50,000 a tang a Rs 10,00,000 thleng lak theihna Mudra Loan an hriatchian chuan puk mamawh leh duh tam tak an awm ngei a ring tih a sawi. Thalai vengva tur deuh chin – college zirlaite hnenah stock market leh a kaihhnawih thil FLW chhung hian zirtir ve nise tha a tih thu a sawi bawk.
Mipui nawlpuiin welfare scheme, social security scheme, loan puk theih chungchang leh an bank account kaihhnawih banking service an dawn theihte chiang zawka hriat an la mamawh tih larsap hian a sawi a. Bank hnathawkten tan an lak a ngai tih a sawi. SLBC report-ah social security scheme leh welfare scheme thenkhata inziaklut an pung tih a hmuh thu sawiin, “He hmasawnna hi bank tan lakna rah a ni a. Tan in lak chhunzawm chuan hei aia hmasawnna lian zawk hi a beiseiawm a ni,” a ti.
.Bank official-te sawi danin, FLW chhung hian bank kaihnawih thil leh sum enkawl chungchang zirtir tum a ni a. Zirlai, loneitu, self help group leh sumdawng tenaute uluk zawka zirtir nise an ti. Financial inclusiveness leh education tih thupui hnuaiah kawng hrang hrangah sum vawm dan, bank service chungchang leh a dangte zirtir tum a ni.
Sum peipun dan leh sum khawl dan awmze nei zawk customer-te hriattir tum a ni bawk a. Sum leh bank account kaihhnawiha bumna laka customer leh mipui nawlpui an him zawk dan tur pawh inzirtir tum a ni.