Chanmari FC in final an lut

Thawhlehni khan Mizoram Premier League (MPL 12) semi-final thawhhnihna khelh a ni a, Chanmari FC chu MLS FC lakah chak nawn lehin final an lut. Semi-final lehlamah Aizawl FC in Dinthar FC lakah 2-0 a hma an hruai laiin game khelh chhunzawm theih a ni lova, final lut tur zawk tihchian a la ni thei lo.
Chanmari FC hian semi-final thawhkhatnaah MLS FC hi 2-0 in an lo hneh tawh a, final hnaih zawk an ni. Semi-final thawhhnihnaah hnehna chan nawn leh ngei tumin tan an khawh. Chanmari FC in chak nawn leh an tum rualin MLS FC in hnehna changin an khingpuite lehthal ngei an tum ve thung a, inkhel hmuhnawm tak an lantir. Semi-final thawh hnihna hi a hmuhnawm viau a, goal pawh a lut har hle. Inkhel hmuhnawm takah goal lut thei lo reng mah se hun tawp dawn hnaih lamah goal li ngawt a lut thung a, hei hian entute mit a titlai leh zual.
Inkhel hmuhnawm takah goal lut a awm theih loh reng hnuin Chanmari FC tan KC Malsawmsanga chuan minute 73-naah hmahruaina goal a thun ta nawlh. MLS laka hmahruaina goal thuntu KC Malsawmsanga hi player of the match ah thlan zui a ni nghe nghe. CFC hian si belhkhawmah 3-0 ngawtin hma an hruai ta a, final an hnaih tak zet tawh.
An khingpui lakah goal chhuah nawn leh a, an dinhmun a chhiat leh zual hnuin MLS FC an che fuh ve ta nge nge a, Ngurthanmawia chuan minute 81-naah goal thunin an si phurh a sut then. Goal an thun vangin phur viau mah se MLS an phur rei lova goal an chhuah belh leh thuai. Chanmari FC tan Lalruatsang chuan minute 86-naah goal thunin an hmahruaina a tizau a, hun pek belh minute 90+5-ah Lalrokima chuan an goal thumna a thun belh zui leh cheu a. Semi-final thawh hnihnaah Chanmari FC hian 3-1 in hnehna an chang zui ta a ni.
MPL12 a khel tha tluang tak Chanmari FC hian semi-final-a an khingpui MLS FC chu si belhkhawmah 5-1 ngawtin an hneh a, phu takin final an lut. Final-ah khingpui hautak zawk an neih ngei a ngai dawn niin a lang a, tlawm nei miah lova League champion Aizawl FC nen an intum ngei dawn niin a lang.
Thawhlehni a semi-final hnuhnung zawkah Aizawl FC chuan si hnih faia an hneh tawh Dinthar FC lakah si hnih bawkin hma an hruai leh hman. Aizawl FC tan hian Lalawmpuia Sailo chuan minute 18-na lekah hmahruaina goal a thun a, minute 30-naah Zomuansanga chuan an goal hnihna a thun zui leh bawk a, si hnih faia hmahruai chungin chawlhlawk an hmang.
Tluang takin first half khelh zawh ni bawk mah se eng that loh vangin second half khelh chhunzawm theih a ni lova, game tihtawp a ni. Game tihtawp a nih vangin an khelh hmasak minute 45 chhung khelh chhunzawm leh a ngai dawn. Minute 45 dang khelh tur la awm bawk mah se Aizawl FC in si belhkhawmah 4-0 ngawtin hma an hruai tawh a, final lut chiang tlukna ngaih an ni. Aizawl FC lehthala final lut nawlh turin Dinthar FC tak thil mak thlentir a, inlehthalna lian thlentir an ngai tawh dawn. MPL 12-a an hneh theih loh Aizawl FC lakah minute 45 chhungin a tlem berah goal li tal an thun a ngai tawh dawn a, an hmabak a hautak viau tawh.