Chapchar Kut denchhenin tlan ho

Chapchar Kut 2024 denchhenin Ningani zing khan Aizawlah a huhova tlan ‘Chapchar Kût Run’ neih a ni a. Chanmari leh Sikulpuikawn atangte in Lammuala tlankhawm a ni.
Lammuala hmanpuitu Youth Services minister Lalnghinglova Hmar chuan hnam hrang hrangin mahni pual Kut an nei a, tunhma leh tun huna lawm dan erawh a inang vek tawh lo, tiin, Mizoten Kut hrang hrang kan neih zingah Chapchar Kut chu ropui leh ngaihhlut hlawh ber a ni tih a sawi.
Mahni Kut ngaihlua chawilar thiam apiangten an hlut tih sawiin, “Kut hi hnam ziarang chawinunna leh inawmtleina bakah khualhiptu pawimawh a ni tel a; Chapchar Kut pawh a nihphung leh ziarang hloh chuang loin kan cheimawi thiam poh leh a hlu zual dawn a ni,” a ti. Chapchar Kut lawm rualin pipu nun mawi – aia upa zah leh Zonun zemawi tak tak uar zel a pawimawh a, nu leh pate thu awih theihna chhawmnun zel a tul tih a sawi bawk.
Ningani vek khan Govt. T Romana College leh Mizoram Youth Commission tangdun an buatsaih North-East Cultural Festival & Pre-Chapchar Kut chu Ningani khan Govt. T Romana College ground-ah hman a ni a. St. Anthony’s College Shillong leh Janata College Assam atanga zirlai leh zirtirtu engemawzat lokal leh Aizawla college dangte an tel. MYC chairman Malsawmzuala Ralte chuan hmanpui.
Chawhnuah Govt. T. Romana College Music Society kaihhruaiin hun hman a ni a, state pawn atanga lokalte pawhin item chi hrang hrang an entir a ni.