Chapchar Kut hi inunauna tichaktu ni se – Art & Culture minister

Chapchar Kut chu Zofate kan inunauna leh lungrualna tichaktu ni se a duh tih Art & Culture minister R Lalzirliana chuan a sawi.
Zirtawpni khan Saitualah Chapchar Kut chu hnam ziarang pholang thei zawngin hman a ni a. Art & Culture minister hian Kut Pa niin a hmanpui. Covid hrileng avanga kum hnih chhung Kut lawmna hman theih loh hnu ah, Mizote Kut zinga ngaihhlut leh ropui ber, Chapchar Kut lawmna Saitual district-a hman a ni leh thei ta chu lawmawm a tih thu a sawi.
“Mizoram leh khawvel hmun hrang hranga Zofate, vawiin ni hi kan inlungrualna leh inunauna tichak tu, hmalam ke kan pen zel theihna’na min phuarkhawmtu lo ni se,” a ti.
Kut Thlengtu, district bawrhsap VL Hruaizela Khiangte chuan Saitual chu khualzinte hiptu, tlang hmingthang 7, lui 6 leh Tamdil a neihte chu uar zawka pholang a, district pawimawh tak a nih theihna’n hma an la tih a sawi a ni.