CHAPCHAR KUT HMAN A NI Ram thatna tura beitute nghet taka dingin beidawng suh ang che u – CM

Zirtawpni khan Zoram hmun hrang hrangah Chapchar Kut 2024 hman a ni a. Sawrkar mi pawimawh – minister leh MLA ten Kut Pa niin an hmanpui.Aizawl Sipai Lammuala hmannaah Kut Pa, chief minister Lalduhoma chuan Zofa zawng zawng Chapchar Kut chibai a buk tih a sawi a. Kut thupuia hman ‘Zo nun zemawi – Tlawmngaihna’ tih chu Zofate min phuarkhawmtu, hnam anga min dinchhuaktu, hringnun zemawi tak a ni, tiin, “He nun ze mawi tak hi kan zingah a dal tial tial a ni tih hai rual a ni loa, hlut thar leh ang u,” a ti.
Kan pi leh puten anmahni hun theuhah hun harsa leh hun khirh tak tak an tawk thin a. Indona leh hun ralti ah ‘Dam leh tlang khatah, thih leh ruam khatah aw’ tiin an inpeizawn a. Thiante chhan tura thih ngam lo mipa chu ‘Pawnfen feng tlak’ an ti mai thin tih a sawi. Tampui mitthi an tawh changin ‘Sem sem dam dam, eibil thi thi’ tiin, mahni hma sial takin tumah an nung loa, an neih ang ang insemin, tumah eitur tlachhama an awm an remti ngai lo tih a sawi bawk. “Chu nunzia chu ram leh hnam din nana hmanraw hriam ber a ni a, vawiin thlengin a la ni reng a ni,” Lalduhoma hian a ti.
“Ram chhan nan tawrh ka huam thin nge, ram mipui chanai ka eiru thin? Thenawm khawvengte tana mi tangkai ka ni thin nge, mi hnawksak ka ni zawk? Kan ram damna thlentu nge kan nih a, hliampui tawrhtirtu zawk tih hi mahni inzawt theuh ang u,” a ti bawk.
Hnam changkangten tunlai changkanna vanga an hnam zia leh nunphung an kalsan hriat a ni loa, thiamna thar lo chhuak zel hmangin an chawimawiin an thehlar zawk tih sawiin, Mizote pawhin chu chu kan ti ve thei tih a sawi a ni.
Ram leh hnam hnungtawlh mek hmuthiamtu, thahnemngai taka kan damna tura beitu tam tak an awm tih a hriat thu chief minister hian sawiin, “Kan ram thatna tura mahni zawna beitute u, nangni hi kan beiseina meichher chhitute in ni a, nghet takin ding zel ang che u. Zam suh ula, beidawng hek suh u. Kan ram leh hnam chhana tungding tur hian, in hmaa kal turin kan inpeih a, kawng dik zawh turin kan pal hi a tliak lo a nih vaih chuan kan ngal zawk tal a tliak ang. Tlak huamin thil tha tih kan ngam a ni,” a ti.
Thenawm atanga tualchhung buaina avanga sahimna zawnga Mizorama rawn lut, sawrkar, kohhran, tlawmngai pawl leh mimalten theihtawp chhuahin kan tuamhlawm chu kan tih tur a nih laiin, kan unau, sahimna zawnga Mizorama khawsa mekte pawh India ram mai ni lo, khawvel huapa kan chhuan ram ralmuang, Mizoramah an rawn lut tih hriatsak a, ralmuang taka kan awm theihna bul, khawtlang leh ram dan zawm tha turin a chah tih a sawi a ni.
Chapchar Kut hmang hian state dang atangin mi engemawzat an rawn kal a. Kut chhimtu zingah Taiwan ram tana India-a palaia awm Bhausuan Ger leh a nupui Hui Chen Chen te pawh an tel a ni.
Pipute atanga hnam kalphung, zai, lam leh lemchan entir a ni a. Kuminah hian Central Young Lai Association leh Mara Thyutlia Py (Mara Thalai Pawl) aiawhten lam an entir bawk.