Kumin Chapchar Kut chu hrilen hnua a vawikhatna atan zalen zawka hman tum a ni a. Kut thupuiah “Zofate Inpumkhatna” tih hman a ni dawn.
Thawhtanni khan Chapchar Kut Organizing Committee chu an chairman, chief minister Zoramthanga hoin kumin March 3-a Chapchar Kut lawm dan turin relin an thukhawm a. Co- chairman, Art & Culture minister R Lalzirliana pawh a tel.
-- Advertisement --
Hrileng avanga kum hnih chhung Chapchar Kut hman dan thin anga hman theih loh hnu ah kuminah hrileng boruak a ziaawm tak avangin, a hmaa tih thin angin huamzau taka hman ni leh se, an ti a. District tin leh state pawna Chapchar Kut lawmna pual sum hman turte sawihoin, a lawmna pui ber Aizawl Sipai Lammuala hman dan tur chu Programme Committee duan tura dah a ni.
Kumin Chapchar Kut thupui (theme) atan ‘Zofate Inpumkhatna’ thlan a ni a. Kut souvenir siam leh rel niin, hetah hian kumina Kut hmanna hlimthla chuantirin post-souvenir a siam leh nise an ti. Kut pual hian mahni remchan dan anga hnam thuam inbel tura inngen ni bawk se an ti bawk.