Mizoram Volleyball Lovers (MVL) chuan Mizorama leimin vanga chhiat tawkte tanpuina turin July ni 13, 2024 (Inrinni) zanah hian R. Dengthuama Indoor Stadium, Mualpuiah Volleyball Charity Match hmuhnawm tak a buatsaih dawn a, LPS leh Zonet lamin live-in an pechhuak dawn a ni.
Tarlan tawh angin, ticket lei turte tan Rs. 50 a ni dawn a, he’ng dawr hrang hrang RAW Digital (Zarkawt), VL Ralte Store (Treasury Square bus stand), PISGAH Automobile (Bawngkawn, Lunglei Road), Unique Creation Salon & Spa (Kulikawn)-ah te lei theih a ni ang a, a hmunah lei tur a awm bawk ang.
Tlai dar 5-ah gate hawn tan a ni ang a, Mizoram khawvela milar comedian/youtuber leh celebrity kan neih hrang hrangte’n volleyball match an khel zui dawn a; zan dar 6 atangin concert-in a zui ang a, tunlai zaithiam engemawzat an inlar ang.
Dar 7-ah programme tan a ni ang a, Mizoram Olympic Volleyball Champion Team leh All Star inkhelin a zui tawh dawn a ni.
He match-ah hian North East Olympics Games-a champion team leh All Stars Team an innuai dawn a; he mi zan vek hian tunlai Mizo zaithiam lar ber berte’n concert-in an chhunzawm dawn a ni.
He charity match en tur hian MVL chuan Mizoram mipuite a sawm tak meuh meuh a ni tih thuchhuah siamin an tarlang.
Charity volleyball match a hmuhnawm dawn
Get real time updates directly on you device, subscribe now.