Chatlak loa thisen pek tur neih theih dan ngaihtuah

Association for Voluntary Blood Donation (AVBD) chuan Zirtawpni khan a thlawna thisen pek chungchanga inrawnkhawm a buatsaih a. Central YMA leh kohhran hrang hrang thalai pawl hruaitute leh National Service Scheme (NSS) state cell officer leh college hrang hranga NSS programme officer-te an tel.
AVBD hruaituten Mizoramah a thlawna thisen pek a that lehzual theihnan leh thisen pekte tangkai zawka a mamawhten an hman theihna tura rawtna an neih an sawi a; pawl hrang hrangin blood donation camp tum khatah thisen pe teuh loa, zing zawka thisen an pek theih dan tur, blood bank lamin harsatna an neih leh thisen petu pawlin harsatna an neih sawiho a ni. Pawl hrang hrang aiawhten an pawlin thisen an pek dan leh rawtna an neih an sawi a, hriatchian duh an neih an zawt bawk.
Zawhna hi AVBD hruaitute leh Civil Hospital Aizawl Blood Bank consultant Dr C Zohmingliani, Synod Hospital Blood Bank hotu Dr B Lalnunthari leh Zoram Medical College & Hospital Blood Bank-a blood bank officer Dr ST Lalhriatpuii ten an chhang a ni.
Inrawnkhawmah hian Central YMA, Central KTP, Aizawl TKP Coordination, PYD (North East leh Mizoram), Salvation Army Youth leh Adventist Youth Federation aiawh leh NSS programme officer-te an tel.