NGO pakua telna, Joint NGO’s Chawngte chuan Mizoram sawrkara minister pathumte hnena ngenna an thlen tawhin awmzia a neih loh vanga an lungawiloh thu sawiin, August 13 thleng ngaihchan an tum a; hemi hnua an beisei ang an hmu lo a nih chuan na zawka sawrkar nawr an tum thu an sawi.
Chawngte Joint NGO sawi danin, kumin May 8&9 khan Aizawlah PWD, Health leh Home minister te an hmu a, mamawh tam tak an neih zingah an mamawh zual tak tak chauh ngaihpawimawh sak tura an ngenna chuan tun thlengin ngaihsak a hlawh lo nia sawiin, hriatthiam har an tih thu an sawi a ni.
Chawngte khawchhung bikah ringawt pawh mi 13448 awmin, police indaihlohna a lian hle a; tunah Chawngte Police Station-a awm thei tura tih mi 24 a nih laiin mi 6 chauh an awm a, constable phei chu pakhat chiah a awm niin an sawi. Home minister hnena police an mamawh belh thu an thlen chuan awmzia a la neilo tih an sawi a ni.
Community Health Centre Chawngte hnuaiah mi 24939 awmin, hmanrua chi hrang hrangah a tlabalin thawktu an indaihloh hle tih an sawi a. Thildang engemawzat zingah doctor pakhat tal dahbelh tura an ngenna chuan ngaihven a hlawh loin, kumin June 6-a doctor 35 lak thar zingah Chawngte-a dah tur ruahman a ni ve lo chu hriatthiam har an tih thu an sawi. CHC Chawngte-ah thawktu awm thei tura ruat mi 46 a nih laiin tunah mi 22 chauh an awm tih an sawi bawk.
SASCI hnuaiah Chawngte khawchhung kawngpui siamthat tura tih chu hna mumal taka thawh a awm lo niin Jt NGO hruaitute hian an sawi a. Kumin July 22 hi he hna zawhfel hun tura tih a nih laiin, Water Bound Macadam (WBM) takngial pawh phah zawh a la niloa, an phah sa pawh ruahsur vang leh hmanraw tha lo hman vangin a chhe deuh vek tawh niin an sawi.
Tun dinhmunah Chawngte leh Diltlang South inkar leh Chawngte leh Lunglei inkar chu lirthei tan kal harsa khawpin a chhia tih an sawi a ni.
Joint NGO Chawngte hruaitute chuan sawrkara an mamawh leh harsatna an thlen chu kumin August 13 thlenga hmalakna awm leh awm ngaihchan phawt an tum a, hemi hnu ah an lungawina ang an hmu lo a nih chuana na zawka sawrkar nawr an tum tih an sawi.
Hun kal tawhah sawrkara an thlil thlen thinah inbumna anga ngaih theih, thawktu dahbelh leh thildangah an lo tawng fo thin tih an sawi a. Mihring hmuh tur awm lo thawktu dahbelh ang chi, reilote thawka hmundanga lakchhuah leh ang chi an lo tawkfo thin chu inzahlohna leh inhmuhsitnaah an ngai tih an sawi a ni.
Chawngte NGO-in Aug.13 thleng minister pathum ngaichang dawn
Get real time updates directly on you device, subscribe now.
Prev Post
Next Post