Chawngtlaia grape chingtute zirtir

Chawngtlaia grape chingtute zirtir
KVK Khawzawl leh ICAR- National Research Centre (NRC) Grapes Pune tangdun chuan Thawhlehni khan Chawngtlai khuaa grape chingtute kalchilhin an hriat tur pawimawh an hrilh.
ICAR–NRC senior scientist Dr NA Deshmuk chuan grape cut dan dik a zirtir a. KVK Khawzawl senior scientist Dr Malsawmkimi’n grape bakah kan thlai dangte hlawk zawka thar thei tura tan a tul dan leh chumi atana tunlai technology hman thiam a pawimawh zia a sawi.
KVK Khawzawl subject matter specialist (Plant Protection) Dr Lalngaihawmi’n rannung eichhetu laka grape ven dan tur, natna hrik laka venna leh an grape than duhna atana vitamin pek ngai a zirtir bawk.
Chawngtlai khuaa grape chingtute hian an grape chawr rual lo chu an harsatna a ni thin tih an sawi a. Hei hi Dr NA Deshmuk hian a chawr rual theih dan tur a zirtir a ni. Grape chingtuten an hriat duh dang zawtin tul dang pawh inhrilh a ni a. Grape enkawlna atan lei tha, rannung thahna hlo leh natna enkawlna tur bakah vitamin pek an ni.
KVK Khawzawl hian TSP (Tribal Sub Plan) hnuaiah Hnahlan leh Chawngtlaia grape chingtute hnenah tun aia hlawk zawka an tharchhuah theihnan theihtawp a chhuahpui a ni.