Chelsea in Neymar an dawr

Chelsea neitu Todd Boehly leh Paris St-Germain president Nasser Al-Khelaifi te chu Paris khawpuiah inhmu in, Neymar chungchangah an indawr. London club lian Chelsea hian nipui bazar inhawn hunah khawvela player man to ber Neymar hi lak an tum dawn niin French chanchinbu Le Parisien chuan a tarlang.
French champion Paris St-Germain chuan kum 2017 khan Neymar hi Barcelona atangin an la lut a. Neymar manah hian €222 million zet an seng a, Neymar hi khawvela player manto ber a la ni reng. PSG ah hian chetha thawkhat viau mahse a hlawh sang em em a. Kum khatah kum khatah €36m vel lai a hlawh phak. Tual-chhung inelnaah champion pui thin bawk mah se, champion an chakna ber Champions League-ah hlawhtlinna a chanpui thei lo thung. UCL lamah beisei an phak thin loh vangin Neymar hi chhuahtir an pawiti lo va, chhuahtir an tum zingah a tel niin tarlan a ni.
PSG in Neymar hralh an hreh lo tih an hriat hnuin Todd Boehly chuan a ngaihven thuai a, PSG president Nasser Al-Khelaifi dawr turin Paris-ah a thlawt lut ta vat a ni. Report in a tarlan dangin Neymar manah hian €60 million (£53m) velin bawrin an indawr a. Man leh mualah inremna nei thei mai mah se kum 31 mi Neymar hlawh sang lutuk hi an indawrna ti-tuanfumtuah a tang thung. Thlasik bazara sum seng hnem uchuak Chelsea hian Neymar manah £53m thehchhuah an hreh lo viau a, Neymar hlawh atan sum tam tak thehchhuah reng a ngai tur hi an hreh ve deuh niin a lang.
Football khel mek zingah footballer tha pali zinga sawi tel ni ziah thin Neymar hian kum 2025 thleng PSG-ah contract a la nei a. Club dang panin a chhuak duh kher dawn em tih a chiang lo hle. Brazil forward pawimawh hi season kelah pawh a che chhe lo viau a, PSG tan Ligue 1-ah vawi 19 khelin goal 12 zet a thun a. Assist vawi 10 zet a nei tling tawh bawk. Season kal mekah hian inelna hrang hrangah goal goal 17 a thun tling der tawh. PSG tan hian Ligue 1-ah vawi 111 khelin goal 81 a thun tawh a. Brazil tan vawi 124 zet khel tawhin, Pele goal thun zat goal 77 a thun tling tawh bawk.