EPL Hmahruaitu thar City

February 15, Nilaini zan khan English Premier League-ah inkhel pawimawh tak a awm a, champion tuma inum fal mek Arsenal leh Manchester City te Emirates Stadium-ah an hmachhawn. Emisates Stadium-a lenglut City in 3-1 ngawtin mualneitu Arsenal an hneh a, City hian Gunners lehpelin table-ah hma an hruai zui nghal.
Champion lai Manchester City hian an khelh hnuhnung berah 3-1 Aston Villa hnehin hmahruaitu Arsenal nen an inkar an tizim a, Gunners nen an inkarah hian point thum chiah a tlazep tawh. Nilai zanah an chak a nih chuan hmahruaitu thar an ni thei dawn. Arsenal hi an khelh hnuhnunga chak zo lo zawn an nih vangin City hneh turin rin ngam an har a. Hun pawimawh taka chetsual hrat an nih thin tawh vangin an lakah rinhlelhna lian tak a awm a, City lakah an hmahruaina an hloh nge nge rinna lian tak a awm lawk a, an mualah chak tura rinkai an ni lo.
Rinlawk ang ngeiin Arsenal leh City te inkhel hi a hmuhnawm a, game pawh a rang tha viau bawk. Chak tumin team hnihten tan an khawh a, goal thun tuma an innawr tawn a hmuhnawm thei hle. Mualneitu Arsenal hi goal thun hmasa thei dinhmunah an ding a, minute 20-naah Eddie Nketiah chuan tauh goal theihna hun tha tak a neih chu uiawm takin a hlah a, City an him hlauh.
Vanneihthlak taka an him hlauh hnuin City in hun tha an nei zui ve zat a, goal an thun nghal bawk. Minute 24-naah Arsenal defender Tomiyasu chuan an si nghak Aaron Ramsdel ball pek a tum a, a tisual. Tomiyasu ball pek hi City midfielder Kevin de Bruyne chuan box pawn atangin dan rual lohin a pet goal a, hmahruaina goal a thun. An hmahruaina tizau tura chak an mamawh em em laia goal chhuah hmasa zawkah an tan vangin Gunners an hawihai hle.
Goal an chhuah hnuin Arsenal hian goal thun theihna hun tha an hmu zui ve leh zat a. Tomiyasu chuan a hun tha neih chu uiawm takin a hlah a, a tihsual siamthat theihna hun remchang a neih a chhawr tangkai zo lo. An hun tha an hloh zawn hnuin Gunners hian penalty an hlawhchhuak ta nge nge. Ciry si nghak Ederson chuan Bakuyo Saka su tluin penalty a chawi. He penalty hi Saka hian minute 42-naah a pet goal a, an si phurh a sut. Chawlhlawk hmain chungnung zawk an awm thei lova, 1-1 a inhneh-tawk chungin chawlh-lawk an hmang.
Second half-ah City an khel tha chhun-zawm zel a, penalty an hlawhchhuak hman thuak. Arsenal defender Gabriel chuan box chhu-ngah Haaland pawtthluin penalty a chawi. VAR hmanga endik a nih hnuin penalty hi sut a ni a, City hi an lo offisde reng. Penalty sut a nih hnuin Grabiel a chesual nawn leh a, ball a pek sual vangin goal an chhuah. Gabriel ball pek sual chhawr tangkaiin mawi takin ball a inpe kual a. Jack Grealish chuan minute 72-naah tha taka a hmawr bawkin hma an hruai nawn lehna goal a thun.
Hnufual zawk an nih nawn leh hnuin Arsenal an hnual a, an thochhuak zo tawh lo. Phur taka inlan City hian goal an thun belh leh thuai. Minute 82-naah De Bryune ball pek tha tak chu Erling Haaland chuan awlsam takin a pet goal a, an chakna a nem nghet. Hun tawp thlengin goal dang a luh belh tawh lova, City chuan 3-1 Arsenal hnehin point thum hlu tak an hmu. City goal thumna thuntu Haaland hian EPL-ah goal 26 a thun tawh a, fal takin top-scorer a ni mek.
Hmahruaitu Arsenal laka point thum hlutak hmu City hian an hneh tak Arsenal point hmu zat point 51 an rih rual a. Goal difference-a tha zawk an nih vangin a chung zawkah an awm a, EPL hmahruaitu thar an ni. City hian Gunners aiin vawikhatin an khel tlem zawk mek thung.