Cheng nuai sing chuang hman dan chhui turin Lokayukta pun
Kum 2015 hnua oil zawn hna thawh tawh lohna Hotoki to Meidum inkar kawng chu tunhnaiah Mizoram sawrkarin cheng nuai sing 17000 sengin a cheitha a, hnuchhawn san tawh kawng cheithatna atana heti zat sum hmanral a nih chhan hi chhuichiang turin Congress party chuan Lok Ayukta-ah ngenna an thehlut.
MPCC Vigilance Department chairman Lalrindika Ralte, MLA sawi danin, Mizoram sawrkarin he project a kalpui chhan nia RTI-a zawhnaah, Hortoki khaw chhehvelah ONGC-in lei hnuai a zirchiang a. Chumi atan chuan khawl leh lirthei lian tak tak lakluh a ngaih avangin he kawng laih hna hi thawh a ni, tiin a chhang.
Hetianga Mizoram sawrkarin Meidum to Hortoki kawng laih a tul chhan a sawi lai hian, ONGC lam atanga RTI hmanga zawhna chhanna leh document an neiha a lan danin, ONGC hian Meidum- Hortoki vela oil/gas zawn hna a thawh hi 2015 October 7 khan a lo tawpsan tawh a, an hmanrua pawh ONGC Forward base, Silchar-ah an dah vek tawh tih sawi a ni.
Hemi tichiang tur hian, ONGC chuan Mizoram sawrkara Directorate of Geology & Mining Annual Report 2022-23 ah Mizoram sawrkarah oil zawn phalna pek avanga a sum chawi tur – petroleum exploration license fee a pe tawh lo tih a chiang a. Mizorama oil/gas zawn hna chu an tawpsan tih a chiangah a ngaih theih tih a sawi.
Oil/gas zawn hna chhunzawm leh tur hian, Directorate General of Hydrocarbons Noida atanga phalna neih a ngai a. ONGC hian tun thlengin Meidum chhehvela oil/gas zawng leh turin phalna a la neilo tih an hriat thu a sawi bawk.
ONGC hian oil/gas hi zawn hna hi tharthawh leh dawn pawh nise, an ni ang company lian tan, an mamawh phawt chuan kawngpui siam hi thil har a ni loa, hemi tichiangtu chu kum 1992 vela Phaisen Mizorama ONGC vekin oil zawn tuma lei verh hna an thawh dawn tumin, Mizoram PWD hi a panna kawng siamna tur sum an pe zawk tih an sawi a ni.
Hortoki to Meidum kawng siamthatna atan hian Mizoram sawrkarin NABARD atanga sum puk a hmang nasa hle nia an hriat thu Lalrindika Ralte hian a sawi a. Ram sum dinhmun a chhiat em em lai a, hmasawnna hnathawhna tur sum puk, ramin a mamawh tih hriatna tur awm si loa cheng nuai sing chuang hmanna chu mimal duhsak zawngte tana hna siam tumna nia an ngaih avangin, hetiang hian hma an la ta tih a sawi a ni.
Zawhna chhangin, restricted tender hmanga contractor thlante chu mipuiin kan hriat lar sa tawh, hmundangah pawh hming lang fo an awm tih a sawi a ni.
Hotoki to Meidum inkar kawng siamna atana sawrkar hnathawh, RTI zawhna chhan a nih danin:
# A thawhkhatna (phase I) ah cheng nuai 4445 sanction a ni a. A contractor chu RV Hluna, Edenthar Aizawl a ni. Phase II-ah cheng nuai 13366 sanction a ni.
# Phase-II hna hi a bika thawh ngai chi hna a nih avangin registered contractor nazawngin an thawk thei loa, restricted tender hmanga contractor tha leh thiambik thlan niin, package-I ah Zoramchhana, Electric Veng Aizawl; package II – Lalthanthuami, Chawnpui Aizawl; package III – KR Construction, Thuampui Aizawl; package IV – V Lalbiakzama, Venghlui Aizawl an ni a. Design & Construction of T Beams-ah KR Construction, Thuampui Aizawl leh Zoramchhana, Electric Veng Aizawl thlan an ni.
# Package I, II, III leh IV hi 2023 June 25-a zawh tur, package V leh VI hi 2023 June 24-a zawh tura tih an ni.