Cheng vbch. 12 hu ruihhlo tiral

Ruihhlo an man, court-in dan anga tihral a phal tawh cheng vaibelchhe 12 chuang hu chu Excise & Narcotics Department chuan Thawhtanni khan Bethani Multipurpose Farm Phunchawngah an tiral.
Drug Disposal Committee secretary, Excise & Narcotic deputy commisisoner Peter Zohmingthanga sawi danin, tuna ruihhlo an tihral hi, Mizoram hmun hrang hranga an man sa zinga court-in thubuai a chinfel tawh a ni a. A hlutna an chhun dan hi tualchhunga an hralh mekna ang vek a ni tih a sawi.
Heroin a tam ber a, kg. 41.188 niin, a hlutna hi Rs. 12,35,64,000 hu a ni. Ganja kg. 56.798 a ni a, Rs. 2,27,192 hu a ni. Methamphetamine kg. 4.358 a ni a, Rs. 59,42,728.43 hu a ni. Ruih nana hman damdawi mum chi hrang hrang, a vaiin gram 739.38 niin Rs. 55482.20 hu a ni a, ruih nana hman khuh damdawi um, a vaiin kg. 28.700, Rs. 43050 hu a tel bawk. Heti hian tun tuma ruihhlo tihral zawng zawng hi Rs. 12,98,32,452.63 hu a ni.
Ruihhlo halraltu Excise & Narcotics commissioner kalchhuak tur Ngurchungnunga Sailo chuan tun tuma heroin an tihral bik hi tum khata an tihral tam ber nia a hriat thu a sawi a. Ruihhlo an mante hi a pel he loh nan kalphung fel tak a awm a, an tan rei tak kawl theih pawh a ni loa, court-in a tihfel tawh chuan a rang thei anga tihral tur a ni, tih a nih thu a sawi.