Cheng vbch. 2414 hu project Union Home minister-in hawng

Union Home minister Amit Shah chuan Inrinni khan Aizawl Sipai Lammualah Zokhawsanga Assam Rifles batallion heaquarters hawngin Laldenga Cultural Centre sakna tur lungphum a phum. Heng bakah hian Mizorama hmasawnna ruhrel dinna tur hrang hrang hawngin, bul tanna tur lungphum a phum a. Assam Rifles-te Zokhawsanga sawnchhuah an nih tur thu a sawi bawk.
Kum 10 kalta chhunga Mizoramin hmasawnna hrang hrang a neihte fakawm a tih thu Amit Shah hian sawiin, Prime minister Narendra Modi kaihhruai sawrkar laipui chu Mizoram hmasawnna atan a intiam thin ang ngeiin a dingnghet tih a sawi. Mizoramin leilung hausakna a neihte haihchhuah a nih theihna’n sawrkar laipuiin theihtawp a chhuah zel tih sawiin, PM-DeVINE kaltlangin hmasawnna atan sum tam tak pek a nih tawh thu a sawi a. Nizung chakna, mau leh tourism-te chu Mizoram hmasawnna tura tangkai nia a hriat thu leh hemi kawngah hian tan lak thar a tul thu a sawi a ni.
Aizawl khawpuia awm Assam Rifles chu vawi tam tak sawnchhuak tawh tura ngenna a dawn thin thu Union Home minister hian a sawi a. Tuna Assam Rifles awmna chu Aizawl khawpui than zelna atana hmun pawimawh a nih avangin, sawnchhuah ngei an ni dawn tih a sawi.
Hmasawnna ruhrel hrang hrang cheng vaibelchhe 2500 dawn senna tur nikhata hawn a ni chu lawmawm a tih thu sawiin, sawrkar laipui leh Mizoram sawrkar chu mipui tana thawk leh ding thin an ni tih a sawi a. Narendra Modi kaihhruai sawrkar chuan hmarchhak state-te a ngaipawimawhin India ram budget-ah pawh hmarchhakte tana sum a ruahman chu za zel 276-a tipungin, hemi ah pawh hian Mizoram hmasawnna tur hrang hrang a awm thu te, sawrkar laipuiin Mizoram hmasawnna a ngaihpawimawh thu te a sawi a ni.
Chief minister Zoramthanga chuan Union Home minister ngeiin Assam Rifles Headquarters thar a hawng chu lawmawm a tih thu sawiin, Mizo mipui tan ni chhinchhiah tlak tak a ni tih a sawi. Assam Rifles chhuah tur ram chu mimal hamthatna atana hman a ni dawn loa, vantlang mipui hman tangkai tura dah a nih tur thu a sawi. Laldenga Cultural Centre sak tur pawh mipui tan thil lawmawm tak a ni, tiin, mipui sing khat an len theih dawn thu a sawi.
Union Home minister hian Assam Rifles Bn Headquarters Zokhawsang ami cheng vaibelchhe 163.237 a sak, Lianchhiari Run (Multi-Facility Centre) Aizawl vbch. 10 a sak, Integrated Command & Control Centre (ICCC) Aizawl vbch. 119.2 a sak, Cooperative Warehouse Bairabi vbch. 2.74 a sak leh, Impounding Dam and Development of Recreation Centre Keilungliah Champhai vbch. 19.88 a sakte a hawng a.
Laldenga Cultural Centre AR Ground sakna tur vbch. 193, Zorinpui – Longmasu NH-502 laihna tur vbch. 781.85, Aizawl Bypass (package-I) NH-6 laihna tur vbch. 329.70, Aizawl Bypass (package-III) NH-6 laihna tur vbch. 720.72, West Phaileng to Marpara Road siamthatna tur vbch. 71 leh, Warehouse/ Commercial Centre Aizawl sakna tur vbch. 2.70 bul tanna atan lungphum a phum bawk.