Chep takin Palestinian Kristianten Easter hmang

Chep takin Palestinian Kristianten Easter hmang
Israel-in Gaza a beih hnuah Gaza, West Bank leh Jerusalem-a Palestinian Kristiante chuan kum hnih a zawnin Isua Thawhleh Ni chu chep takin an hmang leh ta.
Gaza Strip-ah chuan Israeli sipaiten ni 50 dawn ei tur leh puihna luh aphal tawh lo va, Easter hi Pathianni khan Gaza City-a thihna leh chhiatna nasa tak karah Greek Orthodox Church of Saint Porphyrius-ah an hmang.
Easter lawmna atana sakhaw thila punkhawmna lian chu Israeli indo thlawhnaten bomb an thlak hnan mai hlauhna avangin an huaihawt lo.
Hamas-in Israel a beiha Israeli sipaite an chhan let tan hnu lawk, October, 2023 pawh khan Saint Porphyrius hi an lo bomb tawh.
Hemi tum hian biak ina Palestinian tlanchhia 18 vel an thi a. Indona kal mek zelah hian mi 51,000 chuang an thi tawh.
Catholic-ten St Peter’s Square, Vatican-a Easter Mass-ah Pope Francis-a chuan Gaza-ah hian inkahhai puan ni se tiin a sawi nghe nghe.
Palestinian hel pawl, Hamas leh pawl dangte pawh Gaza-a an mi hrente chhuah turin a ngen nghal bawk.
West Bank-ah chuan Israeli thuneituten Palestinian tam tak telin, Kristiante chu Easter-ah khan sakhaw hmun pawimawh tlawh a khuahkhirhsak nasa hle.
East Jerusalem-a Church of the Holy Sepulchre-ah chuan Israeli police chu biak ina luh tum Kristiante nen an innawr nghe nghe.
Kuminah hian West Bank atangin Palestinian 6,000 chuang chauh Easter inkhawma tel phalna pek an ni a, Vatican-in Palestine-a kohhran aiawh a dah pawh biak ina luh phalsak a ni lo.
Palestinian pastor leh theologian, Bethlehem-a Dar al-Kalima University dintu leh president ni mek, Mitri Raheb-a chuan tun anga Israeli-te inkhuahkhirhna kalpui aia khauh hi a la awm ngai lo niin a sawi.
“Pastor ngei pawh Holy Week-ah hian ka chet chhuah an phal lo a ni,” tiin Al Jazeera hnenah a sawi.
Egypt-a Coptic Orthodox Church hotu, Pope Tawadros II chuan Gaza-a Israeli-te chet dan chu a dem tak zet tih a sawi.