Chetsualna avangin mi 5 thi
Chetsualna avangin mi 5 thi
Ni thum chhung khan Mizoramah chetsualna avangin mi panga an thi.
March 23 (Pathianni) zing khawvar hma deuh khan Lawngtlaiah mi pathum chuanna pik-up chesualin pahnih an thi. Thudawn danin, irthei khalhtu V Lalhmangaihsanga (42), AOC Veng Lawngtlai hi Inrinni khan Myanmar-ah bungraw dahin a kal a, a haw lam hi Zawngling khaw daiah mi pahnihin lo pharin Lawngtlai lam an pan a, Pathianni zing dar 4.00 vel khan Lawngtlai 71 – Tetea Petrol Pump bulah kawngthlangah an tlan liam nia sawi a ni. Lirthei khalhtu bakah a mi phurh zinga pakhat, Myanmar lam mi nia sawi chu an thi a, chuang dang pakhat hian hliam a tuar. An chetsual chhan hi hriat chian ni lo mah se, a khalhtu muthlu zauh a nih rin a ni.
March 23 (Pathianni) zan 9.30 vel khan Tlawng luia chengkawl khawrh tuma a thiante nena kal Laltanpuia (31) s/o Rolala (L), Nursery Veng Aizawl chu chesualin tuiah a tla a, a ruang hi zan dar 11.00 velah hmuh a ni.
March 22 (Inrinni) chawhnu dar 3.00 vel khan thianhoa Tlawng lui Sairanga kal zing ami Anthony Lalthlamuana (29), Bawngkawn South chu luiah hian chesualin a tla a, chhan hman a ni lo. A chetsual hnu reilote ah a ruang hi lakchhuah nghal a ni a. A nu chenna Churachandpur district Manipur ah a ruang hi lak a ni.
March 22 chawhma dar 10.30 vel khan Bradly Lalhmangaiha (9) s/o Nicky Malsawmdawngliana, Chhinga Veng chu Chhinga Vengthlang Presbyterian Kohhran Naupang sports-na Aizawl Electric Veng Indoor Stadium-ah futsal an khelh laiin goal ban tlu in a delh a, hliam tuarin Civil Hospital Aizawl panpui nghal ni mah se, a nunna chhan hman a ni lo.
March 21 zan dar 10.00 vel khan Lalthuammawia (30) Saiphai Kolasib district chu electric current man vangin a thi. Thudawn danin Lalthuammawia hi kumin April 3 hian kohhran dan thianghlima nupui nei tur niin, tunlai hian an inbuatsaih ngawrh tawh hle a, an inneihnaa tel tum an chhungte thlenna tur leh nakin zela midang luah theih turin an in hnuaiah room a siam a, hemi panna tur step hi cement plaster tiin, a chhun eng turin pawnah light an fit chawp a, cement khawih an ni a, huh chiau deuhah kelawngin a awm a, hetihlai hian pawna an light fit chawp hi dahsawn tumin a khawih nia ngaih a ni. Hna thawhpui a nei a, an ni hian in chung lama an chhoh san lawk lai niin, an zuk hmu chuan current hian a lo man reng tawh a, current line off tura a lo hrilh bak chu mumalin a biak theih tawh loh a, hemi zan dar 10,30 velah a thi nia sawi a ni.