Chetsualnaah pali an thi In kangah in neitunu thi

Inrinni leh Pathianni khan hmun hniha chetsualnaah mi pali an thi a, in pakhat kangah in neitu ber a thi bawk.
Pathianni chawhnu dar 3.30 vel khan Seling atanga Thingsulthiah pan autorickshaw chu Thingsul khawchhungah a chesual a, mi chuang pali zinga pathum an thi.
Thudawn danin, an chetsualna lai hi Thingsul khaw chhung inkalpawhna kawng, chenna in awm lohna lai niin, brakefail vangin kawng thlangah a tlanliam a, a khalhtu Lalhmingthanga (68) s/o Sangkhuma (L), Luahkimi (54) w/o Thanzauva, C Rohlupuii (69), Vanlalngaia farnu, Seling vek an thi. He auto-a chuang ve Lalrohluni (56) chuan hliam a tuar a, Aizawla enkawl tura lak a ni.
Inrinni chawhnu dar 1.30 vel khan Tuichang luiah K Lalchhandama (34), Hnahthial Model Veng chu a tlahlum. YMA-in lui humhalh lai an neiha venbuk tur siama hnatlanga thawkchhuak zing ami nia sawi a ni.
Inrinni zan dar 10 vel khan Vairengte Chhim Venga Assam type in chhawng khat chu bungrua engmah chuh hman lohin a kang a, in neitu Sumtinkhawli (78) a kang hlum. Kangmei hi choka atanga intan nia hriat a ni a, a kan chhan tak erawh hriat a ni lo. In kan lai hian in neitunu tupa leh a thian pakhat chuan in hnuaiah carrom board an pen a, in a kang tih an hriat meuh chuan a lo nasa tawk a, a pi chhan tumin inchhungah hian zuanglutin tukverhah a zuan chhuah pui a, damdawi in lamah kalpui nghal ni mah se, a lo kan nat deuh avangin a hliam tuar loin a thi. A tupa Lalherliana pawh hian a pi chhan a tumna lamah hian hliam a tuar a, ngaihtuahawm erawh a ni lo tih sawi a ni.