Chhattisgarh-a rel insu-ah mi 11 thi

Chhattisgarh-a rel insu-ah mi 11 thi
Chhattisgarh-a Bilaspur district-a Lal Khadan, Bilaspur-Katni section-ah Thawhlehni khan Korba passenger rel leh bungraw phur rel insuah mi 11 an thi a, mi dang 20 velin hliam an tuar bawk.
Chhattisgarh Chief Minister Vishnu Deo Sai-a chuan chhiatna thlenna hmun hi tlawh nghalin thite chu Rs. nuai 5 theuhva ral tur a nih thu leh hliamte pawh Rs. 50,000-a kan an nih dawn thu a sawi.
“He chhiatna thlengah mi pariat an thi a, pahnih an tang a. Mi 20 velin hliam na tak an tuar a, a bul vela awm zawng zawngten chhanchhuah hna kan thawk a ni,” tiin Bilaspur District Collector (DC) Sanjay Agrawal-a’n a sawi.
“Hmeichhia leh mipa ruang pali ve ve lak chhuah an ni tawh,” tiin Inspector General (Bilaspur Range) Sanjeev Shukla-a chuan sawiin Nilaini chawhma thleng khan chhanchhuah hna hi an la thawk a. An in seng fel hnuah thi zat hi an la pun mai theih thu a sawi bawk.
Bilaspur Collector Agrawal-a chuan hliam tuarte hi Apollo Hospital & Chhattisgarh Institute of Medical Sciences (CIMS), Bilaspur-ah lak an nih hlawm thu a sawi a. “An zinga pakhat dinhmun chu a tha lo hle,” a ti bawk.
Chetsualna thlen hun hi Thawhlehni tlai dar 04:00 vel a ni a, an insu na hle a, passenger phur zawk rel pindan hma lamte chu a per chhe nasa hle a ni.
Thlalak leh video darhah pawh passenger phur rel leh a hma lam pindante chu a chhe nasa tih a lang a, chhanchhuah hna thawktuten dam chhuakte zawn hna an thawk mek ani.
Chhanchhuah hna thawhnaah hian railway thuneitu, tual chhung thuneitu leh National Disaster Response Force (NDRF) mite telin chhiatna a thlen veleh an pan khawm nghal a ni.
Dama lak chhuah zingah nausen pawh a tel a. Medical team leh ambulance pawh tirh nghal an ni a, doctor-ten hliam na zualte chu relah an enkawl nghal nual a, a hnuah rel khawih chet a ngaih avangin an sawn.
Rel insu avang hian a chunga electric wiring leh signaling system pawh a tichhe nasa a, hei vang hian he kawng zawha tlan rel kal vel pawh a tibuai.
Express leh passenger relte chu an zin tur thulh leh an kawng thlaksak an awm a, passenger tangkhangte tan rel dang ruahman a ni bawk.
Rel kawng leh electrical system chhiate siam that leh tumin technical team pawhin zanah pawh hna an thawk chhunzawm nghal bawk.
Railway thuneitute chuan chetsualna thlen chhan an chhui nghal mek a. An hriat theih chinah chuan signal inpekna tha tawk lo emaw, mihringin eng emaw tihsual a nei emaw a nih a rinawm tih an sawi.