Taxation department chuan sawrkar kum khat chhung atana chhiah an khawnkhawm tur bituk zat cheng vaibelchhe 730 chu thla 9 chhunga an khum hnaih hman avangin vbch. 900 ah an tihpun belh.
-- Advertisement --
Mamita Taxation office building thar hawngtu Taxation minister Lalchamliana chuan an department chu Mizoram sawrkar tana sum khawntu ber a nih angin, tunah hian Goods & Service Tax (GST) bakah chhiah chi hrang hrang a khawn mek a. Chhiah cheng vaibelchhe 730 khawn tura sawrkarin a tuk chu thla 9 chhungin vbch.717 a khawn tawh a. Sawrkarin a target hi vbch. 730 atangin vbch. 900-ah a tipung leh tih sawiin, Taxation Department staff-ten sawrkarin a tihpun leh tak hi tlin ngei tuma theihtawp chhuah turin a chah.
“Sawrkarin amahin sum a nei loa, mipui atanga chhiah hrang hrang khawn atangin sawrkarin sum a nei chauh a ni tih hreng chungin, mipuiin kan rilru puthmang kan tihdanglam a tul a, chhiah pek kawngah rilru zau leh puitling tak kan put a ngai a ni “a ti.
14th Finance Commission hnulamah sawrkar laipuioin deficit grant min pe tlem tial tial a, zawi zawia intodelh a, mahni kea din a ngaih tak avangin, chhiah lakna kawngah a department neitute chu theihtawpa tan a ngai lehzual tih Taxation minister hian a sawi bawk.
Mamita Taxation office building leh chowkider quarters sakna atan hian sum ruahman lawk chu nuai 328.53 a ni a. Contractor hi H Rohmingthanga, Mamit Lungsir niin, 2019 October 31 atanga sak tan, 2022 March 30-a zawh a ni.