Chhiatna avanga ram pekte LSC/ house pass tihfel sak rel

Kum 2013-a Laipuitlang leimin, 2014-a Ramhlun Sports Complex leitawlh leh tunhnaia Hunthar leitlahniama in leh lo chante hnena sawrkarin in sakna tur inhmun a lo pek tawhna, Aizawl Ramhlun Sports Complex huamchhunga ‘Chite Rehabilitation Centre’ tia vuaha an tihfel tawh chin ngaihtuahin Thawhlehni khan Land Revenue & Settlement minister Lalruatkima hoin thutkhawm a ni.
Minister chuan heng chhiatna thlenga mahni in leh lo chan vek, chhena in neilote tan sawrkar chuan helaiah hian ram leiin, chenna in sakna tur ram pek an ni tih a sawi a. Mahse LSC emaw house pass emaw tih fel a la nih loh avangin helai hmun neituten loan pawh an lak theih loh mai bakah sawrkar pawhin chhiah (land revenue) a chan zel avangin an LSC tur tihfel thuai a tul tih a sawi.
Thutkhawma tel Aizawl bawrhsap Dr Lalhriatzuali Ralte chuan helai hmuna inhmun pek dan leh ram pek tawh zat leh an dinhmun a sawi a. Land Revenue & Settlement department hotuten helai hmun an enfel leh teh dan, house site an siam zat te an sawi. LSC pek dan chungchang sawiho hnuin, ram pekte LSC tihfel a nih theihna’n bawrhsap hmalakna hnuaia a tul te tihfel thuai a, sawrkarin LSC pek dan hriattirna chhuahin tihfel nise, tiin rel a ni.
Chite Rehabilitation Centre hi sawrkarin mimal hnen atanga a lei niin, helai hmun hi house site 100 ruahman a nih bakah thlanmual, sub-centre leh vangtlang hmun remchangte ram zuah a ni a. Aizawl hmun pahniha leimin leh leitawlh bakah tunhnaia Hunthar leimina in leh lo chan vek, an vaiin chenna in nei lo mi 80 chuang hnenah in sakna tur hmun pek an ni tawh. Mimal engemawzatin in lo te din tawh mah se, a ram neitu nihna LSC emaw house pass emaw tihfel a la ni lo a ni.