Chhiatnaa nunna chan ni hnih chhungin mi panga aia tam

Chhiatnaa nunna chan ni hnih chhungin mi panga aia tam
Tun ni hnih kalta chhung khan Mizoram-ah chetsualna kaihhnawihah nunna chan mi 5 aia tam an awm
January 9 chawhnu dar 3.30 vel khan Lalchangliana, Sihphir Venghlun ami quarry, Sihphir Neihbawi ami chu a chim a, mi 4-in hna an thawk a, an zing ami Muana tia hriat, Manipur lam mi chu lakchhuah niin a hliam tuar loin a thi. Midang pahnih chu he chanchin buatsaih lai hian lakchhuah tuma beih mek a la ni a. Mizoram pawn lam mi nia hriat an ni.
January 8 chawhma dar 10.00 vel khan Lalremruata (39) h/o Zothankhumi leh an fapa Lalduhsanga (7) leh an nau pakhat Amos-a (21) chu Lawngtlai district Kawlchaw West-a bawnghnute sem tura scooter-a an kal chu, khaw luh dawnah pik up-in a su a, a hmunah Lalremruata hi a thi a, a fapa Lalduhsang hi damdawi in thlenpui a nih hnu hemi tlai dar dar 5.00 velah a thi ve leh a ni. Amos-a hi chu a hliam ngaihtuahawm a ni lo tih sawi a ni.
Pik up khalhtu Ranjit Rana (28), Lungpuizawl, Lunglei district hian zu a rui nia sawi a ni a, Burma-a kal haw lam a ni. Mi a sut hnu hian a tlan tlang a, kawngsira parapet a tai phei a, hetah hian nangchingin police-in an la a ni.
January 8 zing dar 8.00 vel khan Lalrinthanga Khiangte (63) chu North Chhimluanga container truck tlu in a delhhlum.
Thudawn danin, truck hi January 8 zing dar 5.30 vel khan N. Chhimluang khawchhungah a let a, excavator hmanga hnuh din a ni. Hnuh din a nih hnu hian truck lehna hmunah hian Lalrinthanga ruang hi an hmu a, truck khalhtu pawh hian mihring a delh tih a hre lo.
Nunna chan hi chenna hmun mumal nei vak lo, vawk chaw laa zuar kual thin a ni tih sawi a ni a. N Chhimluangah hian vui a ni.