Chhimbial mipui aurâwl !

Lalremliana Pachuau

Politik khelmual zet hi chu hmun rothap tak, a ruh no tân chuan lan nawlh nawlhna hmun a ni reng a. World Bank sum hmanga Lunglei – Thenzawl – Aizawl kawngpui siam a nih tirh atang tawh khân, Thenzawl – Lunglei kawngpui hi Aizawl lam kawngpui nen khaikhinin, a chhe hmain a chhe nasa bik êm êm reng a. Aizawl atangin kawngpui nuam tak zawhin Thenzawl kan thleng a. Thenzawl pelh atangin zinkawng a hreawm tan a, Lunglei thlengin kawngpui chhiaah kan insawh phei kum tin ta mai a nih hi!
Kum tina kawngpui thual that a han nih pawh hian, Thenzawl – Aizawl kawngpuite alkatra hmanga luan thar an nih ziah theih laiin, Lunglei Dist lam chan erawh alkatra hmanga luan chu sawi loh, khuar chhe laite lunga hnawha chil mam mai mai hmanga siam a ni ziah bik maite hi a mak hle! PWD lamin Dist Wise-a pawisa an allocate dante ngaihtuahin, Hmuifang huam chhûng kawngpui siam that nâna sum dah zat leh, Lunglei lam chana sum dah zat han en ngawt pawh hian, chhim lam kawt chhuah kawngpui hi tlo tham khawpa siamna tur pawisa a awm ngai lo a ni ber.
ZPM sawrkar hnuaiah cheng vbc 90.69 zet mai, Thenzawl – Lunglei kawngpui siamna tur a lo awm ta a. Mahse, PWD Minister chuan sum awm hi tam a ti ta lutuk tlat mai a. Tichuan, Aizawl khawpui chhûng kawng mam sa reng, alkatra hmanga luan that nân he sum hi pawhpen a ni ta a nih kha. Vantlâng puipunna hmuna video darh (viral) kal tlangin, Aizawl kawngpui mam tha sa reng alkatra hmanga luan that han hmuh hian, Chhim lam mipuite lung a awi thei ta tlat lo.
ZPM sawrkar hian ATL kawngpui pawimawhzia leh, a chhiat that thu an ngaih pawimawhzia sawi reng chung siin, kawngpui siamna tur sum a han awm ve leh tawngka chauha ngai pawimawh an lo nihna thiltih hmangin an lantir leh ta si. Sum pawhpen a han nih hnuah, Chhim lam atanga lungawi lohna a rawn rik chhuak takah chuan, PWD Minister (CM hriatpuina hmu tih hriat tak) chuan ATL kawngpui hi, kum 4 chhûnga siam zawh a nih ngei tur thu puarpawlêng, tuna kawngpui tha duh tawhtute hnena hralh a tumna chuan, lawm a hlawh lo ta hle a nih hi!
Chhuanlamah cheng vbc 90.69 hi pawhpen lo ni ta lo pawh ni se, vawi khata pêk chhuak vek a nih dâwn loh thu, a tahtawla pêk chhuah a nih dâwn avanga ATL kawngpui siam tur pawh hi, tih vat vat theih a nih loh tur thu an sawi te hian, chhim mipuite lung a ti awi zo lo. Cheng vbc 45 pawhpen a ni hrim hrim kha, intham lohna leh inngaih pawimawh lohna lian tak a ni sa tawh tih, ZPM hian a hre thiam thei lo niawm tak a ni!
ATL kawngpui hi Lunglei, Lawngtlai, Siaha leh Chawngte bakah Tlabung tâna kawngpui pawimawh tak a ni vek a. Kha leh chen chhe kumhlun reng mai, tha taka siamna tur pawisa a lo awm takah chuan beiseina sâng tak nen, chhim mipuite’n hma lam hun an thlir phah laia, kum 4 lo awm tur chhûnga siam zawh ngei a nih tur thu han hriat leh hnuhnawh hian, chhim bial mipuite lawm a hlawh mawlh lova nih hi. Tuna kawngpui tha duh tawhin, nakin nakin la tih hi a lawmawm loh reng a ni.
MZP hmalaknaa he sum pawhpen duh loh lantirna, kawngpui dan chah mek hi chhim lama pâwl hrang hrangin an thlawp sup sup danah, Thenzawl – Lunglei kawngpui chhe bik reng an lo nin tlan tawhzia chiang takin a lantir a nih hi. Hei hi mipui aurâwl a ni tih ZPM hian a hriat chian a hun hle. Tin, nawrh kher ngai lova kawng zawn a tum danah, ZPM sawrkar hian a bik takin Lunglei mipuite a tham lovin, a ngaih pawimawh lohzia a thiltih duh dan atangin a lang chiang hle a. Nakin zelah ZPM tân hian a la pawi ngei lo ang tih sawi theih a ni lo.
Ministry pahnih hnuaiah Lunglei hi hetiang hian ngaih pawimawh an lo ni tawh thin. Cabinet Minister 2 an ruat a, MYC Chairman pawh Lunglei MLA ruat an ni thin. ZPM erawh chuan Lunglei mipuite vanga sawrkarna siam thei an ni tih an inhriat thu, thu maia sawi siin duhsakna erawh Lunglei lakah a lantir duh hlek lo thung. HPC thiah thute sawi rik a awm ta hial zawk tak deuh deuh a. He Lunglei mipuite lungawi lohnaah hian, inthlan leh hunah kan lungawi lohna kan lantir ve ngei ang tih thawm a lo ri chhuak ta hial a nih hi!
PWD Minister-in Aizawl khaw chhûng kawng lo chhiat nasat tawhzia, State Capital a nih anga kawngpui tha neih pawimawhzia a sawinate kha, a pawmawm ngei reng a. Mahse, Ministry dang hnuaiah heti takin Aizawl khaw chhûng kawngpui englai mahin an chhe ngai lo. He PWD Minister hnuaiah zet hi chuan, Aizawl khaw chhûng kawngpuite kha hmun tinah an chhe sup sup a nih ber kha! ATL kawngpui siamna tura sum dah ni na ná nâ, Aizawl tâna pawhpen a han ni hrim hrim pawh hian Chhimkun rilru a chawk tho tih, PWD Minister leh ZPM hian an ngaihtuah thiam thei lo a nih hi!
Inthlan a lo awm leh ngei dâwn a. Chhim lam mipuite rilru natna hi, ZPM hian thawi dam dan a ngaihtuah thiam lo a nih vaih chuan, an hma lam hunah an tân a pawi ngei ngei dâwn tih hi sawi ngam a ni. Tin, Lunglei MLA te pawh ZPM hnuaiah an lo danglam bik hlek lo a nih hi. |anrual a huna Aizawl lama an hotute nawr ngam chhim lam hian MLA an la nei lo tluang zel a. Fâm ta Pu LP Thangzika Ex-MLA te anga chhim tâna mi huaisen, chhim lam hamthatna tur leh chanvo humhalhna kawnga mahni nihna thlauhthla ngam MLA, Chhim Mipuite hian thlan tlin nachâng hriat a hun ta takzet a lo ni e!