Chhum tamin Delhi veivahna a tibuai chhunzawm

Chhum tamin Delhi veivahna a tibuai chhunzawm
Chhum leivak zing nasa lutuk avangin Delhi-a thlawhna thlawk leh rel kal vel chu Pathianni khan a buai leh phah a. Indian Railways chuan ram khawpui ber leh a chhahvela chhum zing nasa avang hian Delhi pan tur rel 25 tihkhawtlai a ni tih a sawi.
Rel zin tur tihkhawtlai zingah hian Purushottam Superfast Express, Farakka Express, Anvt Humsafar leh S Kranti Superfast Express te pawh a tel.
Khaw vawt takin a tuam karah Indira Gandhi International Airport, Delhi-a thlawhna eng emaw zat tihkhawtlai a ni bawk.
Indian Meteorological Department (IMD) chuan ram khawpui berah hian a vawh lai berin 12°C a ni tih a sawi a. Air quality index (AQI) chu ‘chhia’ a ni a. Central Pollution Control Board chuan zing dar 9:00-ah khan AQI hi 284 a ni.
IMD chuan ruah a hnai tih a sawi lawk bawk a. India Gate atanga khawpui thlirin engmah hmuh theih loh thuak a ni a, mite chuan Safdarjung velah chuan khaw vawt lutuk tlanchhiatsanin night shelter an tihah an la tawm hlawm.
Night shelter an tiha awmte hi ni khatah chaw vawi hnih, mutbu leh blanket pek thin an ni a. An mamawh a nih chuan a bul lawka AIIMS damdawi in panpui thin an ni bawk.
Inrinni zan khan ruah tlem a tla a, khaw vawh lam pawh 7.7°C a ni tih IMD chuan a tar lang.
India hmar lam hi Pathianni tukah hian chhum leivak chhah takin a tuam a. Rajasthan-a Jodhpur pawh chhumin a bawh khat vek a ni.
Agra, Uttar Pradesh pawh khaw vawt tak leh chhum leivakin a bawh nasa a, Taj Mahal pawh ral atang chuan a hmuh theih mang lo va. Kanpur pawh khua a vawt hle bawk a, autorickshaw khalhtute pawhin hnathawh a har hle niin an sawi.
Jammu & Kashmir thlasik khawpui, Srinagar khaw vawt takin a la tuam zui zel bawk a. Chandigarh pawhin Pathianni khan ruah tlem dawngin a vawh belh zual a. Chhimthlang lamah Maharashtra khawpui, Mumbai pawh chhumin a bawh bawk.