Pakistan-a chhungkaw pakhat chuan Guinness World Record pahnih an siam a, a pakhat zawk chu ‘chhungkaw member zinga pianchampha inang tam ber’ niin, a pahnihna chu ‘unau pianchampha inang tam ber’ record a ni. An chhungkaw pakua an ni a, an vaiin August ni 1 a piang vek an ni!
Larkana, Pakistan a cheng, Mangi chhungkuaa an pa ber Ameer leh nu ber Khudija te chu August ni 1 a piang ve ve an ni a, an nupa hian fa pasarih an nei a, an fate zawng zawng pawh August ni 1 piang vek an ni. An fate hi Sindhoo, Sasui, Sapna, Aamir, Ambar, Ammar leh Ahmar te an ni a, kum 19 leh 30 inkar an ni tawh.
An chhungkaw tan hian August ni 1 hian pawimawh dang a la nei cheu a, Ameer leh Khudija te inneih champha a la ni lehzel. An nupa hian 1991 khan an pianchamphaah an kutsuih a ni a, a kum leh August ni 1-ah an fa hmasa ber Sindhoo an nei a, an fa dang te pawh August ni 1-ah an piang ta zel mai a ni.
Ameer leh Khudija te hian phir tum hnih an nei a, August ni 1 a piang tho an ni a, phir hmasa zawk Sasui leh Sapna te an neih atanga kum nganaah Ammar leh Ahmar te hi 2003 khan an piang ve leh a ni.
Ameer chuan August ni 1-ah chat chat fa neih hi an tum lawk ngai bik lo niin a sawi a, “A lo thleng ve tawp mai a ni,” a ti. An fate zawng zawng hi zai chhuah pakhatmah an awm lo va, Khudija hian hrin pangngai vekin a hring a, thla kim lova piang pakhatmah an awm lo a, August ni 1-a fa hring tura nau vei hma tir pawh a awm ngai lo niin Guinness World Record chuan an tarlang.
Chhungkuaa pianchampha inang tam ber record siam
Get real time updates directly on you device, subscribe now.
Prev Post