Chi peng inhungbik hi min teitetu – Lalduhoma
Chi peng inhungbikna khauh lutuka kalpui chu Zofate min thendarh a, min teitetu a ni tih chief minister Lalduhoma chuan a sawi a. Zohnahthlak hnam hrang hrangten Mizo hnam chhungah kan chi peng chu lungawi takin kalpui zawk turin a sawm.
Nilainia Mizo Zirlai Pawl Assembly vawi 68-na, Champhai Tlangsama neih a hmanpuinaah chief minister chuan, Mizoram sawrkarin Zofate huikhawm a, inpumkhat leh tanrual lama hma lak a tum a, Mizo Diaspora Cell an din tih a sawi. “Khawvel hmaa Zofate sang taka chawikan hi kan duh a, kan theih ang angin hma kan la tan. Khawvel ram hrang hranga cheng Zofaten rawn be pawp ula, a tul ang zelin kan ram tan thawk tlang ang u,” a ti.
Mizoram chu Zofate himna kulh, thlamuang taka Zofate chen za theihna a nih angin ngaihlu tlang a, a thatna turin mahni phak tawk theuha thawk tura sawmin, “Chi peng inhungbikna khauh lutuka kalpui hi min thendarh a, min teitetu a ni. Zohnahthlak hnam hrang hrangte hian Mizo hnam chhungah kan chi peng hi lungawi takin kalpui zawk ila, Mizo anga kan dinchhuahna turah chuan thu khat vua ang u,” Lalduhoma hian a ti.
MZP chu a din tirh phat atangin zirna chawisan kawngah, Zofate irawm chhuak thu leh hla humhim kawngah, Mizo hnamzia humhalh leh chawilar kawngah nasa takin hma a la a, mipui pawhin tha takin an thlawp thin tih chief minister hian a sawi a. Rambuai hun thim karah MZP hian nasa takin tha a thawh a. Student Joint Action Committee anga hma la in, remna a thlen theih nana thawhhlawk ber zing ami an ni tih a sawi.
Vawiin thlengin Zofate huikhawmtu, Zohnahthlak unaute thlavang hauhtu, chhiatna an tawh pawha kantu leh tanpui hmasa thintu an ni, tiin, ram leh hnam hmangaihna thinlung tuh kawngah, zirna chawisan kawngah, hnam zia chawilarna lamah, inpumkhatna lamah, ram hmasawnna lamah hma MZP-in a la zui zel tih a sawi a ni.
Mizo Zirlai Pawl chu ram leh hnam rawngbawlna hmun, zirlaite kawng dik zawhtir tura hmalakna hmun a ni tih hrereng tura ch?hin, “Tute emaw inhampuarna hmun, mimal hamthatna dap nana an hman mai mai in phal tur a ni lo,” chief minister hian a ti.
Thanghlianga Sailo Run-a vantlang inkhawmah hian Champhai South bialtu MLA Lt. Col. Clement Lalhmingthanga chu ‘Assembly Thlengtu’ a ni.