Chief minister a dawihzep – MPCC

ung leh thildangah Mizoram chief minister Lalduhoma chu innghahna tlak a ni loa, a dawihzep nia an ngaih thu Congress party chuan an sawi.
MPCC thuchhuak chuan, chief minister leh NGO Coordination Committee hruaitute inkawmnaah Pu Lalduhoma’n Myanmar nena ramri hung chungchang a sawinaah engemaw duhlohna lantira punkhawm leh lim inhalsak chu awm lo hram se, tha a tih thu a sawi chu pawi a tiin dawihzep thlak a tih thu a sawi.
Myanmar-a cheng Mizote nena kan inunauna tichhe thei tura sawrkar laipuiin Myanmar nena ramri a hung lui a nih chuan Congress party chuan na takin a dodal dawn tih a sawi bawk.
‘Mizo mipuiin Myanmar nena kan ramri hung kan duh lo tih hrereng chunga chief minster Pu Lalduhoma’n ramri hung kan duh lohna lan chhuah tirna tur punkhawm leh lim hal lo tura NGO Coordination Committee a ngen ta mai hi Mizoramin chief minister dawihzep kan nei niah kan ngai,’ a ti.
Congress sawrkar laiin Manipur-ah Anti Tribal Bill avangin khatih laia CM Pu Lal Thanhawla chuan Manipura Zofate tan nasa taka an thlavang hauhin sawrkar laipui khak pawh a hlawh phah tih MPCC hian sawiin, CM Pu Lalduhoma’n central BJP sawrkar hlau a, ramri hung duh lohna punkhawm leh lim hal a hlau chu Congress party chuan pawi a tiin, tlang hrang hranga Zofate tan Pu Lalduhoma hi innghahna tlak a nih loh zia tarlangtuah an ngai tih a sawi a ni.