Children’s Home tihchangtlun dan leh school bag tih zan dan tur sawi

Children’s Home tihchangtlun dan
leh school bag tih zan dan tur sawi
Children’s Home tihchangtlun zel dan tur, Home-a awm naupangte an puitlin huna an awm chhoh zel dan tur lo hmakhua pui bakah school naupangte bag rit lutuk tih zangkhai dan tur sawiin inrawnkhawm a ni.
Social Welfare leh Women & Child Development minister Lalrinpuii hoa thukhawmin resolution a pass tawh bawhzui leh hmalakna tur ruahman ho a nih theihnan Mizoram State Commission for Protection of Child Rights (MSCPCR) chuan Thawhlehni khan Aizawlah inrawnkhawm hi a huaihawt.
Naupang enkawlna hmun, Special Home-a naupangten bahlah loa zirna an chhunzawm theihna’n zirna in tih changtlun dan ngaihtuah a ni a. Children’s Home-a naupang awmte kum 18 an tlin hnua letna/ hawna tur tha leh belhchiandawl chhungkua, mahnia inenkawl thei leh mahni kea ding thei tura thiamna mumal neilo tana enkawl zuina (after care programme) tihhmasawn theih dan sawi a ni. After care programme atana fund a beitham avanga tuna programme kalpui lai pawh duh anga tihhmasawn a harsat zia pawh sawi a ni.
MSCPCR chuan tunhnaiah Aizawl leh Champhai district-a naupang enkawlna hmun – child care institutions a tlawh kual mek a; Children’s Home-a fund leh thawktu indaihlohna leh harsatna an tawhte hmuhpuiin, sutkian a nih theihna tur sawiho a ni bawk.
School Education department enkawlna hnuaia hmalakna sawi a ni a. School bag rit lutuk chu zirlaite tan phurrit leh hriselna lam thlenga nghawng tha lo nei thei a nih avangin school bag rih zawng tihniam thei tura hmalak dan ngaihtuahho a ni a. Zirlai kaihhnawih inenkawlna hrang hrangte naupang tana hmasawnna leh phurrit awm lo tura kalpui leh ruahmanna siam a tul zia sawi a ni.
Inrawnkhawmah hian School Education, Women & Child Development, Samagra Shiksha Mizoram leh Mizoram State Child Protection Society hotute bakah Aizawl Special Home aiawh an tel a ni.